ކޮންސްޓްރަކްޝަން ދާއިރާ ކުރިއެރުވުމަށް ހާއްސަ ކޮށްގެން މިނިސްޓްރީއެއް އުފައްދަވާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވީ، މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ) އިން ބޭއްވި ރަސްމިއްޔާތެއްގައި ވާހަކަފުޅު ދައްކަވަމުންނެވެ.
މުއިއްޒު ވިދާޅުވީ، ރާއްޖޭގައި އިމާރާތްކުރުމުގެ ދާއިރާއަކީ ދެވަނައަށް އެންމެ ބޮޑު ސިނާއަތް ކަމަށާއި ވޭތުވެ ދިޔަ ސަރުކާރުތަކުން ގެންގުޅުނީ އަބަދުވެސް އެހެން ކޮންމެވެސް ދާއިރާއަކާ ގުޅިގެން އެ ސިނާއަތް ބެލެހެއްޓުމުގެ ސިޔާސަތެއް ކަމަށެވެ.
ކޮންސްޓްރަކްޝަން ދާއިރާ އަށް އެއްބާރުލުން ދިނުމަށް އަދިވެސް ކުރެވޭނެ ކަންކަން އެބަހުރި ކަމަށާއި އެގޮތުން އެ ދާއިރާގެ ކަންކަން ބެއްލެވުމަށް ހާއްސަ މިނިސްޓްރީއެއް އުފައްދަވާނެ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ، ކޮންސްޓްރަކްޝަން ދާއިރާއަށް ވަކިން ހާއްސަ މިނިސްޓްރީއެއް އުފެދުމުން އެ ސިނާއަތުގެ ކަންކަމަށް ވަކިން ބޮޑު އިސްކަމެއް ދެވޭނެ ކަމަށެވެ. އަދި ދާއިރާއަށް ބޭނުންވާ ބޭރުގެ އެހީތެރިކަން ހޯދުމުގައި ވެސް ފަސޭހަތަކެއް ލިބިގެންދާނެ ކަމަށް މުއިއްޒު ވިދާޅުވިއެވެ.
ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ކޮންސްޓްރަކްޝަން މިނިސްޓްރީ އެއް ހިންގިއެވެ.
ކޮންސްޓްރަކްޝަން ދާއިރާއަށް ހާއްސަ މިނިސްޓްރީއެއް އުފައްދާ ކަމަށް މުއިއްްޒު ވިދާޅުވެފައި ވާއިރު ކައުންސިލްތަކަށް ހާއްސަ މިނިސްޓްރީއެއް ވެސް އުފައްދަވާނެ ކަމަށް، ރިޔާސީ އިންތިހާބުގެ ކެމްޕެއިން ތެރޭގައި މުއިއްޒު ވަނީ ވިދާޅުވެފައެވެ.
