ނަފްސާނީ ދުޅަހެޔޮކަމަކީ އަސާސީ ހައްގެއް ކަމަށާއި އެ ހައްގު ކަށަވަރުކުރުމަށް ސިޔާސަތުތައް ބައްޓަންކުރައްވާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދު ފާހަގަ ކުރަމުންދާ ދުނިޔޭގެ ނަފްސާނީ ދުޅަހެޔޮކަމުގެ ދުވަހާއި ގުޅިގެން ޑރ. މުއިއްޒު ކުރެއްވި ޓްވީޓެއްގައި ވިދާޅުވީ، ނަފްސާނީ ދުޅަހެޔޮކަމަކީ، ކޮންމެ ރައްޔިތަކަށްމެ ކަށަވަރުކޮށްދޭންޖެހޭ އަސާސީ ހައްގެެއް ކަމަށާއި މި އަސާސީ ހައްގު ކަށަވަރުކޮށްދެވޭނީ، ހަމަޖެހޭ ދުޅަހެޔޮ ވެއްޓެއް ގާއިމުކުރުމާ އެކު، އެއްވެސް ހުރަހެއް ނެތް، ނަފްސާނީ ފަރުވާއާއި އެހީތެރިކަން ފަހިކޮށްދީގެން ކަމަށެވެ.
މިގޮތުން އެމަނިކުފާނުގެ ސަރުކާރުގައި މި މަގަށް ސިޔާސަތުތައް ބައްޓަންކުރައްްވާނެ ކަމަށް ޑރ. މުއިއްޒު ވިދާޅުވިއެވެ.
ޑރ. މުއިއްޒު މިހެން ވިދާޅުވެފައިވާއިރު ނަފްސާނީ މައްސަލަ ހުންނަ ފަރާތްތަކަށް އިންޓަނޭޝަނަލް ފެންވަރުގެ ހޮސްޕިޓަލެއް ލ. ގަމުގައި ތަރައްގީ ކޮށްދެއްވާނެ ކަމަށް މީގެ ކުރިން ޑރ. މުއިއްޒު ވަނީ ވިދާޅުވެފައެވެ. މި ހޮސްޕިޓަލުގައި ގަސް ގިނަ ހިތްފަސޭހަ މާހައުލެއް ގާއިމް ކޮށްދެއްވާނެ ކަމަށް ވެސް މުއިއްޒު ވިދާޅުވިއެވެ.
މީގެ އިތުރުން ނަފްސާނީ ދުޅަހެޔޮކަމާ ގުޅޭ ހާއްސަ ގާނޫނެއް މަޖިލީހުގެ ތެރެއިން އެކުލަވާލައްވާނެ ކަމަށް ވެސް ޑރ. މުއިއްޒު ވަނީ ވިދާޅުވެފައެވެ. ޑރ.
މުއިއްޒު ވިދާޅުވީ ނަފްސާނީ ދުޅަހެޔޮ ކަމުގައި ހިމެނޭ ހުރިހާ ކަމެއް ހިމަނައިގެން ސަރުކާރުގެ ނިޒާމުގައި އެކަމަށްް ދޭންޖެހޭ އިސްކަން މަޖުބޫރުވާ ވަރަށް ހައްދަވާނެ ކަމަށެވެ.
