ދަރުމަވަންތަ ހޮސްޕިޓަލުގެ ހިދުމަތް ފުޅާކުރުމާއެކު ދުނިޔޭގެ ފެންވަރުގައި ކެންސަރަށް ފަރުވާ ލިބޭ ގޮތް ހައްދަވާނެ ކަމަށް އިދިކޮޅު ޕީއެންސީގެ ރިޔާސީ ކެންޑިޑޭޓް، ޑރ. މުހައްމަދު މުއިއްޒު ވިދާޅުވިއެވެ.
މުއިއްޒު މިހެން ވިދާޅުވީ، ރޭ ސަލްޓަން ޕާކުގައި ބޭއްވި "ރައްޔިތުންގެ ގާތަށް" ޕްރޮގްރާމުގައި މީހަކު ކުރި ސުވާލަކަށް ޖަވާބު ދެއްވަމުންނެވެ.
މުއިއްޒު ވިދާޅުވީ ސިއްހީ ދާއިރާގެ މެނިފެސްޓޯގައި މައިގަނޑު ދެ ކަމަކަށް އަލިއަޅުވާލައިފައި ވާނެ ކަމަށާއި އެއް ކަމަކީ ބަލިވުމުގެ ކުރިން ބަލިން ދުރުވުމަށްޓަކައި ކުރަން ޖެހޭ ކަންކަމުގެ ތެރޭގައި ހިމެނޭ ޕްރިވެންޓިވް ހެލްތް ކެއާ އާއި ޕަބްލިކް ހެލްތް ދާއިރާއަށް ދޭން ޖެހޭ ސަމާލުކަން ދިނުން ހިމަނާފައި ވާނެ ކަމަށެވެ.
މުއިއްޒު ވިދާޅުވީ ކެންސަރަކީ ވަރަށް ބޮޑަށް ބަލި ފެތުރުމުގެ ކުރިން ދިރިއުޅުމުގެ ވައްޓަފާޅިއަށް ބަދަލުތަކެއް ގެނެސް، ކާން ބޯން ބޭނުންކުރާ ތަކެއްޗަށް ބަދަލު ގެނެސްގެން މަދުކުރެވިދާނެ ކަމެއް ކަމަށާއި އެކަހަލަ އެހެން ބަލިތަކެއްވެސް އެބަހުރި ކަމަށެވެ. އަދި ސިއްހީ ދާއިރާގެ މެނިފެސްޓޯގައި ހުށަހަޅަނީ ބަލިތަކުން ދުރުކުރުމަށް ކުރަންޖެހޭ ކަންކަމާއި ހޭލުންތެރި ކުުރުމަށް ކުރަން ޖެހޭ ކަންކަމަށް ބޮޑު ހޭދައެއް ކުރަން ކަމަށާއި އޭގެ ސަބަބުން ބަލިތައް މަދުވާނެ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ބަލި ވީމައި ދޭން ޖެހޭ ފަރުވާ މިހާރަށް ވުރެ އެތައް ގުނައެއް ރަނގަޅު ކުރައްވާނެ ކަމަށާއި މިހާރު އައިޖީއެމްއެޗް އެ ހުރީ ވީރާނާވެ، ހިދުމަތް ވަރަށް ދަށަށް ގޮސްފައި ކަމަށެވެ. އަދި އައިޖީއެމްއެޗްގެ ހިދުމަތްވެސް ބޮޑުތަނުން ރަނގަޅުކޮށްދެއްވާނެ ކަމަށާއި ދަރުމަވަންތަ ހޮސްޕިޓަލަކީ އެންމެ ފުރިހަމަ މިނުގައި ތަރައްގީކޮށް އެތަނުގައި ދެވޭ ހިދުމަތްތައް ރަނގަޅުކޮށް، ދަރުމަވަންތަ ގްރޫޕް އޮފް ހޮސްޕިޓަލެއްގެ ގޮތުގައި ފުޅާކޮށްދެއްވާނެ ކަމަށް މުއިއްޒު ވަނީ ވިދާޅުވެފައެވެ.
މުއިއްޒު ވިދާޅުވީ އެހެން ގިނަ ހިދުމަތް ތަކެއް ދެވޭ ގޮތަށް އިންޓަނޭޝަނަލް އެންމެ ރަނގަޅު ފެންވަރުގެ ހޮސްޕިޓަލްތަކުން ކްލިނިކްތައް އެތަނުގައި ގާއިމް ކޮށްދެއްވާނެ ކަމަށެވެ. އަދި މާލެ ސަރަހައްދުގެ އިތުރުން ކުޅުދުއްފުށި ހޮސްޕިޓަލް އަދި ހިތަދޫ ހޮސްޕިޓަލުގައި ވެސް އެފަދަ މުހިއްމު ފަރުވާދެވޭ ގޮތް ހައްދަވާނެ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ދަރުމަވަންތަ ހޮސްޕިޓަލަކީ ރައީސް ޔާމީން ހިންގެވި ވަރަށް ބިޔަ ބޮޑު މަޝްރޫއެއް ކަމަށާއި އޭގެ ސަބަބުން މި ސަރުކާރުން ވަރަށް ގިނަ ވާހަކަތައް ރައްޔިތުންގެ ހިތުގައި ސައްކު އުފައްދަންވެސް ދެއްކި މަޝްރޫއެއް ކަމަށެވެ. އަދި ދަރުމަަވަންތަ ހޮސްޕިޓަލަކީ މި ރާއްޖޭގެ ރައްޔިތުން ބޭސްފަރުވާއަށް ދިއުމުގެ އަޅުވެތިކަމުގެ ސަލާމަތް ކުރަންވެގެން ރައީސް ޔާމީން އެޅުއްވި ވަރަށް މުހިއްމު ފިޔަވަޅެއް ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ އޭނާ ސިޔާސަތަކަށް ވާނީ ދަރުމަވަންތަ ހޮސްޕިޓަލު އިތުރަށް ފުޅާކޮށް، އިތުރު އިމާރާތްތައް އަޅައި ރާއްޖެ އެއްގައުމަކަށް ހާއްސަކޮށް ބޭސްފަރުވާއަށް ކުޑަކަމަކު ވިޔަސް ދާން ޖެހޭ ޖެހުން ހުއްޓުމަކަށް ގެނައުން ކަމަށެވެ. އަދި އޭރުން ރާއްޖެއިން ބޭރަށްގޮސް ހޭދަކުރަންޖެހޭ ބޭރު ފައިސާ ހޭދަކުރަން ޖެހޭ ޖެހުން ނިމުމަކަށް ގެެނެސް، ރާއްޖޭގައި ތިބެގެން ރަނގަޅު ފެންވަރުގެ ހިދުމަތް ލިބި، ރާއްޖެއިން ބޭރުންވެސް އެ ހިދުމަތް ހޯދަން މީހުން އައުން ކަމަށް މުއިއްޒު ވިދާޅުވިއެވެ.
