ރިޔާސީ އިންތިހާބިގެ ދެވަނަ ބުރުގައި ވާދަ ކުރައްވާ އިދިކޮޅު ޕީއެންސީ ކެންޑިޑޭޓް އަދި މޭލެ ސިޓީގެ މޭޔަރު ޑރ.މުހައްމަދު މުއިއްޒުގެ ގެ ކޮޅަށް މަސްތުވާތަކެތި ވައްދައި، ރެއިޑްކުރަން ރާވާން ފަށައިފިކަމަށް ދެކެވޭ ވާހަކަތައް ފުލުހުން ދޮގު ކޮށްފިއެވެ.
ފުލުހުން ނެރުނު ކުރު ބަޔާނެއްގައި ބުނެފައި ވަނީ މުއިއްޒު ގެކޮޅަށް ފުލުހުން މަސްތުވާތަކެތި ވައްދައި، ރެއިޑްކުރަން ރާވާން ފަށައިފިކަމަށް ބުނެ ޗެނަލް 13 އިން ގެނެސްދީފައިވާ ހަބަރަކީ ކަނޑައެޅިގެން ދޮގު ހަބަރެއް ކަމަށެވެ.
އަދި އެއީ ސިޔާސީ މަގުސަދެއް ހާސިލް ކުރުމުގެ އިތުރުން ދިވެހި ފުލުހުންގެ އަގު ވައްޓާލުމުގެ ގޮތުން ގެނެސްދީފައިވާ ހަބަރެއް ކަމަށް ވެއެވެ. ހަމައެހެންމެ ފުލުހުންގެ ހިދުމަތާމެދު ރައްޔިތުންގެ އިތުބާރު ގެއްލޭ ގޮތަށް، ޒިންމާދާރު ކަމެއް ނެތި އަދި މައުލޫމާތުގެ ސައްހަކަން ބެލުމަށް އެއްވެސް މަސައްކަތެއް ނުކޮށް ހަގީގަތާ ހިލާފު ހަބަރުތައް ގެނެސްދިނުން ވަނީ އެ ހިދުމަތުން ކުށްވެރިކޮށްފައެވެ.
އަދި ނޫސްވެރިކަމުގެ އަސާސީ މިންގަނޑުތަކާއި ހިލާފު މިފަދަ އަމަލުތައް ނުކުރުމަށް ފުލުހުން ވަނީ ހުރިހާ ނޫސްވެރިންނަށް އިލްތިމާސް ކޮށްފައެވެ.
