ވޯޓު ދިނުމަށް އެއްވެސް މީހަކަށް ހުރަސް އެޅުމަކީ އަދަބު ކަނޑައެޅިފައިވާ ކުށެއްކަމުގައި އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބް ވިދާޅުވެއްޖެއެވެ.
މިއަދު ސޯޝަލް މީޑިއާ ޕްލެޓްފޯމް އެކްސްގައި ހަބީބު ވިދާޅުވީ އެއްވެސް މީހަކު ވޯޓު ދިނުމަށް ދަތިކުރުން، ނުވަތަ ވޯޓު ދިނުމަށް އެއްވެސް މީހަކަށް ހުރަސް އެޅުމަކީ މަނާކަމެއް ކަމަށެވެ. މި ގޮތުން ވޯޓު ދިނުމަށް ހުރަސް އަޅާނަމަ 4 މަހާ 1 އަހަރާ ދެމެދުގެ މުއްދަތަކަށް ޖަލަށްލެވޭ ވަރުގެ ހުކުމެއް އަންނާނެކަމަށްވެސް ހަބީބް ވަނީ ވިދާޅުވެފައެވެ. ނުވަތަ 4000 އާއި 12،000 ރުފިޔާ އާއި ދެމެދުގެ އަދަދަކުން ޖޫރިމަނާ ކުރެވޭނެ ކަމަށްވެސް ހަބީބް ވަނީ ވިދާޅުވެފައެވެ.
މީގެ އިތުރުން ހަބީބް ވިދާޅުވީ ވޯޓުކަރުދާސް ނޫން އެހެން އެއްވެސް އެއްޗެއް ވޯޓު ފޮށްޓަށްލުމަކީވެސް އަދަބު ކަނޑައެޅިފައިވާ ކުށެއް ކަމަށެވެ. އަދި އެ ކުށުގެ އަދަބެއްގެ ގޮތުގައި 2 މަހާ 6 މަސް ދުވަހާ ދެމެދު ޖަލަށްލުން ނުވަތަ 2000 ރުފިޔާ އާއި 6000 ހާސް ރުފިޔާ އާއި ދެމެދުގެ އަދަދަކުން ޖޫރިމަނާ ކުރެވޭނެ ކަމަށް ހަބީބް ވިދާޅުވިއެވެ.
ރިޔާސީ އިންތިހާބުގެ ދެވަނަ ބުރަށް އީސީ އިން ތައްޔާރުވަމުން އަންނައިރު އެ ކޮމިޝަނާ ކަމާ ބެހޭ އިދާރާތައް ގުޅިގެން އާންމުން ހޭލުންތެރިކުރުމަށް ގިނަ މަސައްކަތްތަކެއް ދަނީ ކުރަމުންނެވެ. އަދި އިންތިހާބުގެ ކަންތައްތައް ސުލްހަވެރިކަމާއެކު ކުރިއަށް ގެންދިއުމަށް އެ ކޮމިޝަނުން އަންނަނީ ފުރިހަމައަށް ތައްޔާރުވަމުންނެވެ.
