ޕީއެންސީގެ ރިޔާސީ ކެންޑިޑޭޓް މާލެ ސިޓީގެ މޭޔަރު ޑރ. މުހައްމަދު މުއިއްޒު، ރިޔާސީ އިންތިހާބުގެ ދެވަނަ ބުރަށް ތާއީދު ހޯއްދެވުމަށްޓަކައި ސިނަމާލެ ފްލެޓް ތަކަށް ޒިޔާރަތް ކުރައްވައިފިއެވެ.
މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބުގެ ފުރަތަމަ ބުރުގެ ވަގުތީ ނަތީޖާ ދައްކާ ގޮތުގައި ޑރ. މުއިއްޒު އަށް 101،635 ވޯޓު ލިބިވަަަޑައިގެންފައި ވާއިރު، އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހް އަށް ލިބިވަޑައިގެންފައި ވަނީ 86،161 ވޯޓެވެ. މި ދެ ބޭފުޅުންނަށް އެންމެ ގިނަ ވޯޓު ލިބި 50 ޕަސެންޓް ވޯޓު އެއްވެސް ކެންޑިޑޭޓަކަށް ލިބިފައި ނުވާތީ އެ ދެބޭފުޅުން ވަނީ ދެވަނަ ބުރަށް ވަޑައިގެންފައެވެ.
އެއާއެކު ދެ ކެންޑިޑޭޓުންގެ ކެމްޕެއިން ހަރަކާތްތައްވެސް ފޯރި ގަދަވަމުންދާ މި ދަނޑިވަޅުގައި މިއަދު ހަވީރު މުއިއްޒު ސިނަމާލެ ފްލެޓް ތަކަށް ޒިޔާރާތް ކުރައްވާ ރައްޔިތުންގެ ކަންބޮޑުވުމާއި ޝަކުވާތައް ވަނީ އަޑުއައްސަވާފައެވެ. މި ހަރަކާތުގައި ޕީޕިއެމްގެ ސަޕޯޓަރުންގެ އިތުރުން އިދިކޮޅު ކޯލިޝަންގެ އިސް ބޭފުޅުން ވަނީ ބައިވެރިވެވަޑައިގެންފައެވެ.
މީގެ އިތުރުންވެސް ނިމިދިޔަ ހަފްތާ ތެރޭގައި މުއިއްޒު ވަނީ ނ، ރ، ބ އަދި ޅ އަތޮޅުގެ ރަށްތަކަށް ކެމްޕެއިން ދަތުރުތަކެއް ކުރައްވާފައެވެ. މިހާރު މާލޭގައި ހުންނެވި ނަމަވެސް ކުރިއަށް އޮތް ދުވަސްތަކުގައި ދެކުނުގެ ރަށްތަކަށް ދަތުރު ކުރައްވާނެ ކަމަށް މުއިއްޒުގެ ކެމްޕެއިން ތަރުޖަމާނު މުހައްމަދު ތޮލާލް ވަނީ ވިދާޅުވެފައެވެ.
އިންތިހާބުގެ ދެވަނަ ބުރު އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާއިރު އެމްއެންޕީ ފިޔަވާ އިތުރު އެއްވެސް ޕާޓީއާއެކު އިދިކޮޅުން ކޯލިޝަން ހަދާަފއި ނުވެއެވެ. އިންތިހާބުގައި ތިންވަނަ ހޯދި ޑިމޮކްރަޓުގެ އިތުރުން ޖުމްހޫރީ ޕާޓީންވެސް ނިންމާފައި ވަނީ އެއްވެސް ޕާޓީއެއްގެ ކޮޅަށް ނޭރުމަށެވެ. އަދި އަމިއްލަ ގޮތުން ރިޔާސީ އިންތިހާބުގެ ފުރަތަމަ ބުރުގައި ވާދަ ކުރެއްވި ފާރިސް މައުމޫންގެ އިތުރުން އުމަރު ނަސީރުވެސް ވަނީ އެއްވެސް ޕާޓީއަކަށް ތާއީދު ނުކުރައްވާނެ ކަމަށް އިއުލާން ކުރައްވާފައެވެ.
