ގައުމިއްޔަތުގެ ވިސްނުން އިސްކޮށް، މިނިވަންކަން ދެމެހެއްޓުމުގެ ވިސްނުން ގެންގުޅުމަށް ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވީ، ރިޔާސީ އިންތިހާބުގެ ދެވަނަ ބުރަށް ކެމްޕެއިން ކުރެއްވުމަށް ހއ، ހދ، އަދި ށ އަށް ކުރައްވަމުން ގެންދަވާ ދަތުުރުގައި ހދ. މުރައިދުއަށް ވަޑައިގެން ރައްޔިތުންނާ ބައްދަލުކުރައްވާ ވާހަކަ ދައްކަވަމުންނެވެ.
މުއިއްޒު ވިދާޅުވީ، ގައުމީ ދުވަސް ފާހަގަ ކުރަމުން ދާއިރު، އާ ކުރަންވީ ގައުމީ ރޫހު ކަމަށާއި ގައުމުގެ މިނިވަންކަމާ ގުޅިގެން ހުރި ކަންބޮޑުވުންތައް އެއީ އެއްވެސް ގޮތެއްގައި ސިޔާސީ ވިސްނުމެއް ނޫންކަމަށެވެ.
މުއިއްޒު ވަނީ ގައުމިއްޔަތުގެ ވިސްނުން އިސްކޮށް، މިނިވަންކަން ދެމެހެއްޓުމުގެ ވިސްނުން ގެންގުޅުމަށް ގޮވާލައްވާފައެވެ.
ސަރުކާރުން މަޝްރޫއުތަކަށް އިހުމާލު ވެފައިވާ ކަން ފާހަގަކުރައްވާ މުއިއްޒު ވަނީ އެރަށުގެ ސްކޫލުގެ ޖާގައިގެ ދަތިކަމާއި، ސިއްހީ ނިޒާމާއި ކުނި މެނޭޖު ކުރުމުގައި ހުރި މައްސަލަތައް ހައްލު ނުވުމަކީ ރައްޔިތުންގެ އެންމެ ބޮޑު ޝަކުވާކަމަށް ވިދާޅުވެ އެކަންކަން ހައްލުކޮށްދެއްވާނެ ކަމަށް ވިދާޅުވެފައެވެ.
މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބުގެ ފުރަތަމަ ބުރުގެ ވަގުތީ ނަތީޖާ ދައްކާ ގޮތުގައި ޑރ. މުއިއްޒު އަށް 101،635 ވޯޓު ލިބިވަަަޑައިގެންފައި ވާއިރު، އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހް އަށް ލިބިވަޑައިގެންފައި ވަނީ 86،161 ވޯޓެވެ. މި ދެ ބޭފުޅުން ކުރެ ބޭފުޅަކަށް 50 ޕަސެންޓް ވޯޓު ލިބިވަޑައިގެންފައި ނުވާތީ އެ ދެބޭފުޅުން ވަނީ ދެވަނަ ބުރަށް ވަޑައިގެންފައެވެ.
