މީޑިއާތަކަށް ދައުލަތުގެ ބަޖެޓުން ވަކި ޕަސެންޓެއްގެ ފައިސާ ދިނުމަށް ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވައުދު ވެވަޑައިގެންފިއެވެ.
މުއިއްޒު މިފަދައިން ވައުދު ވެވަޑައިގެންނެވީ، ރޭ އަރިއަތޮޅަށް ކުރައްވަމުން ގެންދަވާ ދަތުރުގައި އދ. މަހިބަދޫއަށް ވަޑައިގެން އެ ރަށުގައި ބޭއްވި ޖަލްސާއެއްގައި ވާހަކަ ދައްކަވަމުންނެވެ.
މުއިއްޒު ވިދާޅުވީ، ނޫސްވެރިން ނުވަތަ މީޑިއާއަކީ ޑިމޮކްރަސީއެއް ވަރުގަދަ ކުރުމުގައި އެންމެ މުހިންމު އެއް ފަރާތް ކަމަށާއި ސަރުކާރެއް ޖަވާބުދާރީ ކުރުވުމުގައި ވެސް އެންމެ އިސްދައުރެއް އަދާކުރާ ޑިމޮކްރަސީގެ ހަތަރު ވަނަ ބާރު ކަމަށެވެ.
މިގޮތުން ގާނޫނަށް ބަދަލު ގެނެސްގެން، ދައުލަތުގެ ބަޖެޓުން ވަކި ޕަސެންޓެއް ނޫސްވެރިކަމުގައި މަސައްކަތްކުރާ އެކި ކަހަލަ މީޑިއާތަކަށާއި ނޫސްވެރިކަމުގައި މަސައްކަތް ކުރާ އެކި ފަރާތްތަކަށް ލިބޭނެ ގޮތް ހައްދަވައިދެއްވާނެ ކަމަށް މުއިއްޒު ވިދާޅުވިއެވެ.
މިހާރު ސަރުކާރުގެ ކޮންމެވެސް ކުންފުންޏަކުން މީޑީއާތަކަށް ފައިސާ ދޭ ގޮތަށް އޮތުމުން ސަރުކާރުގެ ބާރާއި ނުފޫޒު ނޫސްވެރިކަމަށް ފޯރާ ކަން ފާހަގަކުރައްވާ މުއިއްޒު ވަނީ އޭނާގެ ވެރިކަމެއްގައި ސަރުކާރު ޒިންމާދާރުކޮށް، ނޫސްވެރިން ކުރާ ބުރަ މަސައްކަތުގައި ފުރިހަމަ އެހީތެރިކަން ދޭ ރައީސަކަށް ވާނެ ކަމުގެ ޔަގީންކަން ދެއްވާފައެވެ.
މުއިއްޒު ވިދާޅުވީ، ނޫސްވެރިކަމުގެ ދާއިރާއަށް ވަންނަން ބޭނުންވާ މީހުންނަށް ތައުލީމާއި ތަމްރީނުގެ ފުރުސަތުތައް ވެސް އެންމެ ރަނގަޅަށް ފަހިވެފައި ނެތް ކަމަށެވެ. އެހެންކަމުން ޒަމާނީ ތަރައްގީ އާއި ޒަމާނީ ޑިމޮކްރަސީއެއް ހާސިލުކުރަން ބޭނުންވާނަމަ ދައުލަތުގެ ހާއްސަ ނިޒާމެއްގެ ތެރެއިން މީޑިއާތަކަށް އެހީތެރިކަން ދެވޭނެ ގޮތެއް އޮންނަން ޖެހޭ ކަމަށް ވެސް މުއިއްޒު ވިދާޅުވިއެވެ.
މުއިއްޒު މިހެން ވިދާޅުވެފައިވާއިރު މީޑިއާތަކަށް ދައުލަތުގެ ބަޖެޓުން ފައިސާ ދޭން އެމްޑީޕީގެ މެނިފެސްޓޯގައި ވެސް ވަނީ ހިމަނައިފައެވެ.
ދޮންކަލޯ ބަޖެޓުތީ ހުސްނުވާއެއްޗެއްތަ، ރެޔާދުވާލު ތިވާ ހުރިހާ ވައުދުފުއްދޭނެބާ، އެންމެން ގަމާރެއްނޫން އިނގޭ