އދ. މާމިގިލީގެ މަގުތައް ރަނގަޅު ފެންވަރުގައި ތަރައްގީކޮށް، ފެންވަރު ރަނގަޅު ހޮސޕިޓަލެއް ހައްދަވައިދެއްވާނެ ކަމަށް ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިފަދައިން ވިދާޅުވީ، ރިޔާސީ ކެމްޕެއިންނަށް ކުރައްވާ ދަތުރުގެ ތެރެއިން އދ. މާމިގިއްޔަށް ވަޑައިގެން އެ ރަށުގައި ކުރިއަށް ގެންދިޔަ ކެމްޕެއިން ޖަލްސާގައި ވާހަކަ ދައްކަވަމުންނެވެ.
މުއިއްޒު ވަނީ، މާމިގިލި މަގުތައް ހަދަން ޖެހޭ ކަމަށާއި އެހެންކަމުން ރަނގަޅު ފެންވަރުގައި މަގުތައް ހައްދަވައި ދެއްވާނެ ކަމަށް ވިދާޅުވެފައެވެ.
މި ސަރުކާރުން މަގުހެދުމުގެ މަޝްރޫއު ފެށި ނަމަވެސް އެމަސައްކަތް މަޑުޖެހިފައިވާ ކަމަށް މުއިއްޒު ފާހަގަ ކުރެއްވިއެވެ. އަދި އެ ސްޕީޑް ބަދަލުކޮށް މަގުތައް އަވަސް ސްޕީޑެއްގައި ކުރިއަށް ގެންދަވާނެ ކަމަށް މުއިއްޒު ވިދާޅުވިއެވެ.
ހަމައެހެންމެ އެރަށުގެ ޕޯޓުގެ ހިދުމަތް ހުއްޓިފައިވާ ކަން ފާހަގަކުރައްވާ އެ ހިދުމަތް ފަށާނެ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ، ސިއްހީ ނިޒާމު ވަރުގަދަކުރަން ޖެހޭ ކަމަށާއި އެގޮތުން ފެންވަރު ރަނގަޅު ހޮސްޕިޓަލެއް ހައްދަވައި ދެއްވާނެ ކަމަށް ވިދާޅުވިއެވެ.
މީގެ އިތުރުން ވެސް ބޭންކްގެ ބްރާންޗެއް ގާއިމްކޮށްދީ، އެމްއެންޔޫގެ ކެމްޕަސްއެއް ވެސް ގާއިމް ކޮށްދެއްވާނެ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ، ޒުވާނުން ބޭނުންވާ ރަނގަޅު ފެންވަރުގެ ސްޕޯޓްސް ފެސިލިޓީއެއް ގާއިމް ކޮށްދެއްވާނެ ކަމަށެވެ.
މުއިއްޒު ވަނީ މިސަރުކާރުން ގިނަ މަޝްރޫއުތައް ހިންގާ ސްޕީޑް ލަސް ކަން ފާހަގަ ކުރައްވާފައެވެ. ނަމަވެސް އޭނާގެ ވެރިކަމެއްގައި ހުރިހާ މަޝްރޫއެއް އަވަސް ސްޕީޑެއްގައި ކުރިއަށް ގެންދާނެ ކަމަށް މުއިއްޒު ވިދާޅުވިއެވެ.
