އެހެން ކުލައެއްގެ ގަލަމަކުން ވޯޓު ލައިފިނަމަ، އަދި ވޯޓު ކަރުދާހުގައި އެއް ފާހަގައަށް ވުރެ ގިނަ ފާހަގަ އެއް ގޮޅިއެއްގައި ޖަހައިފިނަމަ ވޯޓު ސައްހަ ނުވާނެ ކަމަށް ކަނޑައަޅައިފިއެވެ.
އަންނަ ހޮނިހިރު ދުވަހު ބާއްވާ ރިޔާސީ އިންތިހާބަށް އިލެކްޝަންސް ކޮމިޝަނުން ވާ ތައްޔާރީތަކާ ބެހޭގޮތުން މައުލޫމާތު އެރުވުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ކޮމިޝަންގެ ނައިބު ރައީސް އިސްމާއީލް ހަބީބު ވިދާޅުވީ، އިންތިހާބަށް ލަފާ ދޭ ކޮމިޓީ އާ އެކު އެ ކޮމިޝަނުން މިދިޔަ ހޮނިހިރު ދުވަހު ބޭއްވި ބައްދަލުވުމުގެ ތެރެއިން ޕާޓީތަކުން ހުށަހެޅި ކަންކަމަށް ރިއާޔަތްކޮށް ބައެއް ނިންމުންތައް ނިންމާފައިވާ ކަމަށެވެ.
އިލެކްޝަންސް ކޮމިޝަންގެ ނިންމުންތަކުގެ ތަފްސީލަށް ވަޑައިގަތުމުގެ ކުރިން ހަބީބު ވިދާޅުވީ، މިނިވަންކަމާ އެކު އިންތިހާބުގެ ކަންކަން ރަނގަޅަށް ގެންދިއުމަކީ އެ ކޮމިޝަނުގެ މަސްއޫލިއްޔަތެއް ކަމަށާއި، އިންތިހާބުގެ ކަންކަން ރަނގަޅަށް ކުރިއަށް ދޭތޯ ކޮމިޝަނުން ކަށަވަރުކުރަން ޖެހޭ ކަމަށެވެ.
އެހެންކަމުން، އިންތިހާބުގައި ލެވޭ ވޯޓަކީ ސިއްރު ވޯޓަކަށް ހެދުމަށްޓަކައި އިލެކްޝަންސް ކޮމިޝަނުން ތިން ނިންމުމެއް ނިންމާފައިވާ ކަމަށް ހަބީބު ވިދާޅުވިއެވެ.
އެ ތިން ނިންމުމުގެ ތެރެއިން އެއް ނިންމުމަކީ އާދައިގެ ގަލަމެއްގެ ގޮތުގައި އިލެކްޝަންސް ކޮމިޝަނުން ބަލަނީ ކަޅު ނުވަތަ ނޫކުލައިގެ ގަލަމެއް ކަމެވެ. ހަބީބު ވިދާޅުވީ، ލަފާ ދޭ ކޮމިޓީގައި ސިޔާސީ ޕާޓީތަކުން ފާހަގަކުރި އެއް މައްސަލައަކީ ވަކި ކުލައެއްގެ ގަލަމަކުން ވޯޓު ކަރުދާހުގައި ފާހަގަ ޖެހުމަށް ރާވަމުންދާ މައްސަލަ ކަމަށެވެ. އޭނާ ވިދާޅުވީ ގާނޫނު އޮންނަ ގޮތުން ވޯޓުލާން ޖެހެނީ އާދައިގެ ގަލަމަކުން ކަމަށާއި، އެހެންކަމުން އާދައިގެ ގަލަމަކީ ކޮބައިކަން އެ ކޮމިޝަނުން މާނަކޮށްފައިވާ ކަމަށެވެ.
އެހެންކަމުން އެ ނޫން ކުލައެއްގެ ގަލަމަކުން ވޯޓު ކަރުދާހުގައި ފާހަގައެއް ނުޖެހޭނެ ކަމަށާއި، ކަޅު ނުވަތަ ނޫ ކުލަ ނޫން އެހެން ކުލައެއްގެ ގަލަމެއް ހިފައިގެން ވޯޓު ލާން މީހަކު އަތުވެއްޖެ ނަމަ، އެ ގަލަމެއް ވޯޓުލާ މަރުކަޒަކަށް ނުވެއްދޭނެ ކަމަށް ވިދާޅުވިއެވެ.
ވަކިވަކި މީހުން ވަކި ކުލައެއްގެ ގަލަމަކުން ފާހަގަކުރަން އަންގާ މައްސަލަ ފާހަގަވެފައި ވަނީ ބައި އިލެކްޝަންތަކުން ކަމަށާއި، އެ އިންތިހާބުތަކުގައި ބައެއް މީހުން އެގޮތަށް އަންގާފައިވާ ކަމުގެ މައްސަލަ، ވޯޓުލާން އަންނަ ފަރާތްތަކުން ކޮމިޝަންގެ އޮފިޝަލުންނަށް ރިޕޯޓުކުރި ކަމަށް އޭނާ ވިދާޅުވިއެވެ.
ދެވަނަ ނިންމުމަކީ އެއް ފާހަގަ އަށް ވުރެ ގިނަ ފާހަގަ، ކެންޑިޑޭޓުންގެ ނަމާ ދިމާލުގައި އޮންނަ ގޮޅީގައި ނުޖެހޭ ގޮތަށް ނިންމި ނިންމުމެވެ. ހަބީބު ވިދާޅުވީ، އިލެކްޝަންސް ކޮމިޝަންގެ ވިސްނުމުގައި އެއްވެސް މަޖުބޫރީ ހާލަތެއް އޮންނާނެ ކަމަކަށް ގަބޫލުނުކުރެވޭ ކަމަށާއި، އެ މީހަކު ވޯޓު ލާން ޖެހޭނީ އަމިއްލަ އިހްތިޔާރުގައި ކަމަށެވެ. އޭނާ ވިދާޅުވި ގޮތުގައި، އެހެންނޫން ކަމަށް ވަންޏާ ވޯޓު ބާތިލްވާނެއެވެ.
ހަބީބު ވިދާޅުވީ އެފަދަ ހާލަތްތަކުގައި ވޯޓުލާ މީހާގެ ނިޔަތަކީ ރަނގަޅު ފާހަގައެއް ޖެހުން ކަމުގައިވިޔަސް، އެކަމުން ނާޖާއިޒު ފައިދާ ނަގާނަމަ، އެކަމަށް ފުރުސަތު ނުދެއްވާނެ ކަމަށެވެ.
ތިންވަނަ ނިންމުމެއްގެ ގޮތުގައި ހަބީބު ފާހަގަކުރެއްވީ، ވޯޓުލާ ބޫތު ފާހަގަ ޖަހާ މީހާގެ ފުރަގަހުން ފެންނަ ގޮތަށް އިލެކްޝަންސް ކޮމިޝަނުން ހަދަން ނިންމި ނިންމުމެވެ. އެންމެ ފަހުން ބޭއްވި ލޯކަލް ކައުންސިލް އިންތިހާބުގައި ވޯޓުލާ ބޫތު ހަދާފައި ހުރީ އޮފިޝަލުންނަށް ވޯޓުލާ މީހާ ކުރިމަތިން ފެންނަ ގޮތަށެވެ.
ނަމަވެސް ވޯޓު ކަރުދާހުގެ ފޮޓޯ ނެގުމާއި، އަސްލު ކަރުދާހުގެ ބަދަލުގައި އެހެން ކަރުދާހެއް ލުން ފަދަ ވާހަކަތައް އަޑުއިވުމުން، ވޯޓުލާ ބޫތު، ފާހަގަ ޖަހާ މީހާގެ ފަހަތުން ފެންނަ ގޮތަށް އިލެކްޝަންސް ކޮމިޝަނުން ބަދަލުކުރީ ކަމަށް އޭނާ ވިދާޅުވިއެވެ. ހަބީބު ފާހަގަކުރެއްވި ގޮތުގައި، މިގޮތަށް ނިންމި ނިންމުމުގެ ސަބަބުން، ވޯޓުލާ މީހުންގެ ހަރަކާތްތައް މޮނިޓަރުންނަށާއި އިންތިހާބުގެ އޮބްޒާވަރުންނަށް ރަނގަޅަށް ފެންނާނެއެވެ.
