ނެޝަނަލް މެންޓަލް ހޮސްޕިޓަލެއް ލ. ގަމުގައި އަޅުއްވައިދެއްވާނެ ކަމަށް ޕީއެންސީގެ ރިޔާސީ ކެންޑިޑޭޓް އަދި މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވީ ލ އަތޮޅަށް ކުރައްވާ ކެމްޕެއިން ދަތުރުގެ ތެރެއިން އެ އަތޮޅު ގަމަށް ވަޑައިގެން ރައްޔިތުންނާ ބައްދަލު ކުރައްވާ ދެއްކެވި ވާހަކައިގައެވެ.
މުއިއްޒު ވިދާޅުވީ، ރާއްޖޭގައި ނެޝަނަލް މެންޓަލް ހޮސްޕިޓަލެއް އަޅުވައިދެއްވާނެ ކަމަށް މީގެ ކުރިން ވިދާޅުވެފައިވާ ކަމަށާއި އެ ހޮސްޕިޓަލަކީ ގަމުގައި އަޅާ ހޮސްޕިޓަލް ކަމަށެވެ.
މި ހޮސްޕިޓަލުގައި ގަސް ގިނަ ހިތްފަސޭހަ މާހައުލެއް ގާއިމް ކޮށްދެއްވާނެ ކަމަށް ވެސް މުއިއްޒު ވިދާޅުވިއެވެ.
މުއިއްޒު އިތުރަށް ވިދާޅުވީ، ނަރުދަމާ ނިޒާމު ރަނގަޅުކުރަން ޖެހޭ ކަމަށާއި އެކަން ހައްލުކޮށްދެއްވާނެ ކަމަށެވެ.
އަދި ލ. ފޮނަދޫ އަދި ގަމުގެ ހުރިހާ މަގެއް ރަނގަޅު ފެންވަރަށް ހައްދަވައިދެއްވާނެ ކަމަށް ވެސް މުއިއްޒު ވިދާޅުވިއެވެ.
ގަމުގައި ނޭޝަނަލް މެންޓަލް ހޮސްޕިޓަލެއް އަޅުއްވަން މުއިއްޒު ވައުދު ވެވަޑައިގެންނެވިއިރު ރިޔާސީ ކެމްޕެއިންނަށް ކުރައްވާ ދަތުރުގެ ތެރެއިން ލ. ފޮނަދޫއަށް ވަޑައިގެން އެ ރަށުގައި ކުރިއަށް ގެންދިޔަ ކެމްޕެއިން ޖަލްސާގައި ވާހަކަ ދައްކަވަމުން މުއިއްޒު ވަނީ ގަމު ހޮސްޕިޓަލް ތަރައްގީކޮށް، ޓާޝަރީ ހޮސްޕިޓަލަކަށް ބަދަލުކުރައްވާނެ ކަމަށް ވިދާޅުވެފައެވެ.
މި ހަފްތާގެ ތެރޭގައި ކެމްޕެއިންނަށް މުއިއްޒު ވަނީ އ. ރ. ބ. ޅ އަދި ލ. އަތޮޅަށް ވަޑައިގެންފައެވެ. ލ އަތޮޅުގެ ދަތުރުގެ އެއްބައި ނިންމެވުމަށް ފަހު މާލެ ވަޑައިގެން ރިޔާސީ ބަހުސް ނިންމަވާ ތ. އަތޮޅަށް ވަޑައިގެންފައި ވާއިރު، ލ. ގެ ބާކީ ހުރި ރަށްތަކުގެ ތެރެއިން ބައެއް ރަށްރަށަށް ވެސް އަދި ވަޑައިގަންނަވާނެއެވެ.
