ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު ގިނަ ވައުދުތަކެއް ތ. ވޭމަންޑޫ ރައްޔިތުންނާށް ކުރައްވައިފިއެވެ.
ރިޔާސީ ކެމްޕެއިންނަށް ކުރައްވާ ދަތުރުގެ ތެރެއިން ތ. ވޭމަންޑޫ ވަޑައިގެން ރައްޔިތުންނާ ބައްދަލުކުރައްވާ ވިދާޅުވީ، މިރަށަކީ ތަރައްގީއަށް މުހިންމު ރަށެއް ކަމަށާއި އެހެންކަމުން މިރަށުގައި ގިނަ މަޝްރޫއުތަކެއް ހިންގަން ނިންމަވާފައިވާ ކަމަށެވެ.
މިގޮތުން މިރަށުގައި ބޮޑު ބަނދަރެއް ހެދުމަކީ މުހިންމު ކަމެއް ކަން ފާހަގަކުރައްވާ މުއިއްޒު ވިދާޅުވީ، ފެންވަރު ރަނގަޅު ބަނދަރެއް ހަދައިދެއްވާނެ ކަމަށެވެ.
މީގެ އިތުރުން ރަށުގެ މަގުތަކުގައި ތާރު އަޅުއްވައިދެއްވާނެ ކަމަށާއި ކިންބިދޫ އަދި ވޭމަންޑޫ ގުޅާލަދެއްވާ ދެރަށުގެ ބިން ވެސް ހިއްކައި ދެއްވާނެ ކަމަށް މުއިއްޒު ވިދާޅުވިއެވެ.
ހަމައެހެންމެ މިސަރުކާރުން ސިއްހީ ނިޒާމަށް ވަރަށް ބޮޑަށް އިހުމާލުވެފައިވާ ކަން ފާހަގަކުރައްވާ މުއިއްޒު ވިދާޅުވީ، ވޭމަންޑޫގައި ފެންވަރު ރަނގަޅު ބޮޑު ހޮސްޕިޓަލެއް އަޅުއްވައިދެއްވާނެ ކަމަށެވެ.
ވޭމަންޑޫ ރައްޔިތުން މުއިއްޒުއަށް ހޫނު މަރުހަބާއެއް ވިދާޅުވެފައިވާއިރު ގިނަ ބަޔަކު ބަނދަރު ސަރަހައްދަށް ވަނީ އެއްވެފައެވެ.
