ވާނުވާ ބަނދު އުވާލައްވާނެ ކަމަށާއި ބަންދުގައި ބެހެއްޓޭ މުއްދަތު 48 ގަޑިއިރަށް ހައްދަވާނެ ކަމަށް ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕެއިންނަށް ކުރައްވާ ދަތުރުގެ ތެރެއިން ތ. ތިމަރަފުއްޓަށް ވަޑައިގެން ރައްޔިތުންނާ ބައްދަލުކުރައްވާ ވިދާޅުވީ، ވާނުވާ ނޭނގުމުގެ ތެރޭގައި އެތައް އަހަރެއް، އެތައް މަހެއް، އެތައް ދުވަހެއް ވުމަކީ އިންސާފެއް ނޫން ކަަމަށެވެ.
އަދި މި ސަރުކާރުން މިފަދަ ކޮންމެ ކަމެއް ކުރިއަށްގެންދަނީ ވަރަށް ބޭއިންސާފުން ކަަންވެސް މުއިއްޒު ވަނީ ފާހަގަކުރައްވާފައެވެ.
މުއިއްޒު އިތުރަށް ވިދާޅުވީ، މި ސަރުކާރުގެ އިހުމާލުގެ ސަބަބުން ވަރަށް ގިނަކަންކަން މި ރަށުގެ ރައްޔިތުންނަށް ނުފުދިވާ ކަމަށާއި މިގޮތުން ބަނދަރުގެ ހާލަތާއި، މަގުތަކުގެ ހާލަތު ފެނިވަޑައިގަންނަވާ ކަމަށެވެ.
އެކަންކަމަކީ މިފަދަ ބޮޑު ރަށެއްގައި، މި ފަސް އަހަރު ނިމިގެންދާއިރު، ނިމިފައި ހުންނަން ޖެހޭ ކަންކަން ކަމަށާއިި ނަމަވެސް އެ ކަންކަމަށް އިހުމާލު ވެފައިވާ ކަމަށް މުއިއްޒު ވިދާޅުވިއެވެ.
މިދިޔަ 2020 ވަނަ އަހަރުގެ ތެރޭގައި ތ. ތިމަރަފުށީގައި ޓެރަރިސްޓު ހަމަލާއެއް ދޭން އުޅުނުކަމުގެ ތުހުމަތުގައި އެ ރަށުން ހައްޔަރުކުރި އަށް މީހަކު ހައްޔަރުކުރިއެވެ.
އެ މައްސަލާގައި ހައްޔަރުކޮށް، ދައުވާ ކޮށްފައިވަނީ:
- އަލީ މުނީޒު، ކެނެރީގެ، ތ. ތިމަރަފުށި
- އަބްދުﷲ ޝަރީފް، ފެހިވިދުވަރުގެ، ތ. ތިމަރަފުށި
- އަހްސަން މުހައްމަދު، އަސްރަފީވިލާ، ތ. ތިމަރަފުށި
- މުހައްމަދު އާސިރު، އަސުރުމާގެ، ތ. ތިމަރަފުށި
- އަލީ އަރުހަމް މުހައްމަދު، ފެހިވިލާ، ރ. ކަނދޮޅުދޫ
- ޝަމާހް ޝަރީފް، ސައިމާ، ތ. ތިމަރަފުށި
- އިބްރާހިމް ލޫތު، ރޯޒްމީޑު، ނ. ކުޑަފަރީ
- އަބްދުﷲ އިމާދު، ބީޗް ހައުސް، ރ. މަޑުއްވަރީ
މިހާތަނަށް މި އެއްވެސް މީހަކަށް ހުކުމްކޮށްފައި ނުވާއިރު އެ މައްސަލާގައި މީގެ ކުރިން ވަކި މުއްދަތަކަށް މުނީޒް ދޫކޮށްލިއިރު އޭނާ ދޫކޮށްލާފައިވަނީ ޝަރުތުތަކަކާއެކު ބޭސްފަރުވާއަށެވެ. އޭނާއަކީ ގޮހޮރުގެ ބަލި ކަމެއް ހުރި މީހެއް ކަމަށް އާއިލާއިން ބުނެއެވެ.
މި މީހުން އަތުލައިގެންފައި ވަނީ، ނަސާހް-3 ނަމަކަށް ކިޔާ ހުއިފިލަނޑާ ނަގާ ދޯންޏެއްގައި އައިއީޑީއެއް ތައްޔާރު ކުރަން އުޅުނު ކަމަށް ލިބުނު މައުލޫމާތަކާއި ގުޅިގެން ފުލުހުން ހިންގި އޮޕަރޭޝަނެއްގައެވެ. އެ ދޯނި ބަލައި ފާސްކުރި އިރު އައިއީޑީއެއް ތައްޔާރު ކުރުމަށް ބޭނުން ކުރެވިދާނެ ކަމަށް ބެލެވޭ ބައެއް އާލާތްތައް އެ ދޯނިން ފެނިފައިވެއެވެ. އަދި ދޯނި އަޅާފައި އޮތް ސަރަހައްދުން މޫދުއަޑި ބަލައި ފާސްކުރި އިރު 10 މީޓަރު އަޑިން، ބަޑިބޭސް އެކުލެވޭ ކަމަށް ބެލެވޭ ކާޓްރިޖްތަކެއް ފެނިފައިވެއެވެ.
މި މައްސަލައާ ގުޅިގެން ބަލައިފާސް ކުރި ގެއަކުން، އައިއީޑީއެއް ތައްޔާރު ކުރަން ބޭނުން ކުރެވިދާނެ ބައެއް އާލާތްތަކާއި ގޮވާ ތަކެތި ތައްޔާރު ކުރުމާ ގުޅޭ މެނުއަލް ފަދަ ލިޔުންތައް ހުރި ޑިވައިސްތައް ފެނިފައިވެއެވެ. ހަމައެއާއެކު މި މައްސަލާގައި ތުހުމަތު ކުރެވިގެން ހައްޔަރު ކުރި މީހަކު އެކްސްޕްލޯސިވްއެއް ތައްޔާރު ކުރަން ބޭނުންވާ ކެމިކަލް ހޯދާފައިވާ ކަމަށް ފުލުހުން ވަނީ ތަހުގީގުގެ އަލީގައި ބުނެފައެވެ.
