އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހާއި އެ މަނިކުފާނުގެ ތަރުޖަމާން އަދި ޑިފެންސް މިނިސްޓަރު މާރިޔާ އަހުމަދު ދީދީ އަށް އިދިކޮޅު ޕީއެންސީގެ ނައިބު ރައީސް އަބްދުއްރަހީމް އަބްދުﷲ (އަދުރޭ) ފާޑުވިދާޅުވެއްޖެއެވެ.
ގއ. ވިލިނގިލީގައި ބޭއްވި ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ކެމްޕެއިން ޖަލްސާގައި ވާހަކަ ދައްކަވަމުން އަދުރޭ ވިދާޅުވީ، ރައީސް ސޯލިހާއި މާރިޔާ މިހާރު ކުރައްވާ ކަމަކީ މުއިއްޒުގެ އަބުރަށް އަރައިގަތުން ކަމަށެވެ.
މާރިޔާ އާއި ރައީސް ސޯލިހަށް އިންޒާރު ދެއްވައި އަދުރޭ ވިދާޅުވީ، ނަމަ ނަމަ މުއިއްޒާއި އޭނާގެ އަނބިކަނބަލުންގެ އަބުރަށް ދެން އަރައި ނުގަތުމަށާއި އިދިކޮޅުން އެކަން ކުރަން ވެއްޖެނަމަ މާރިޔާ އާއި ރައީސް ސޯލިހުގެ އަބުރަށް ވެސް އަރައިގަނެވިދާނެ ކަމަށް ވިދާޅުވެފައެވެ.
އަދުރޭ ވަނީ ރަނގަޅަށް ވާހަކަ ދައްކާލަން ހަމަހަމަ ޕްލެޓްފޯމެއްގައި ޕޯޑިއަމް ކައިރިއަށް ވަޑައިގަތުމަށް ރައީސް ސޯލިހާއި މާރިއާއަށް ދައުވަތު ދެއްވާފައެވެ.
އަދުރޭ ވިދާޅުވީ، ރާއްޖޭގެ ވެރިކަން ކުރަން ދިވެހިން ބޭނުންވަނީ އިލްމީ، ގާބިލް، އަހުލާގު ރަނގަޅު އަދި އިސްލާމީ އަދަބުތަކަށް ލޯބިކުރާ ބޭފުޅެއް ކަމަށެވެ. ނަމަވެސް، ރައީސް ސޯލިހުގެ ކިބައިގައި އެއިން އެއްވެސް ސިފައެއް ނެތް ކަމަށް ވިދާޅުވެ އަދުރޭ ވަނީ ފާޑުވިދާޅުވެފައެވެ.
އަދުރޭ ވިދާޅުވިގޮތުގައި ކެމްޕެއިނަށް އެކި ރަށްރަށަށް ވަޑައިގަތުމުން އިވެނީ މަޝްރޫއުތައް ނުފެށުމާއި ނުނިންމުމުގެ ހުސް ޝަކުވާ ކަމަށެވެ.
އޭނާ އިތުރަށް ވިދާޅުވީ، ރައީސް ސޯލިހު ރާއްޖެއަށް ގެނެސްދިން ތަރައްގީ އަކީ ވައްކަން ކުރުމުގެ ތަރައްގީ ކަމަށެވެ. ރައީސް ސޯލިހަކީ ރާއްޖޭގެ ތާރީހް ދުށް އެންމެ ބޮޑު ވަގު ކަމަށް އަދުރޭ ވިދާޅުވިއެވެެ. އަދި މާރިޔާއަކީ ގާނޫނަށް ކޮޅުފައިން އަރާފައި ހުންނެވި ބޭފުޅެއް ކަމަށް ވިދާޅުވެ ފާޑުކިޔުން އަމާޒު ކުރެއްވިއެވެ.
އަދުރޭ ވަނީ ސަރުކާރުން އުޅެނީ ރައީސް ޔާމީނާއި ޑރ. މުއިއްޒު ޖައްސަަން ކަމަށާއި އެކަން ނުވާނެކަން ފާހަގަ ކުރައްވަމުން ވިދާޅުވީ، އިދިކޮޅުގެ ސަރުކާރެއް ހިންގާނީ ޔާމީންގެ ލަފައާއި މަޝްވަރާގެ މަތިން ކަމަށެވެ. އަދި މުއިއްޒުގެ ވެރިކަމުގައި އެންމެ އުފަލުން އެންމެ ފުރަތަމަ ކުރައްވާނެ އެއް ކަމަކީ ޔާމީން މިނިވަންކުރުން ކަމަށް ވެސް ވިދާޅުވިއެވެ.
ސާބަހޭ އަދުރޭ ތީ އަޅުގަނޑު ކުރިން ހީކުރި ކަހަލަ، މިހާރުގެ ރައީސް ކަހަލަ ގަމާރެއް ނޫން ކަން މިހާރު އެނގޭ ޤާބިލިއްޔަތުކަމާއި ހިންގުން ހުރިރިގޮތް ރާއްޖޭގެ ހުރިހާ ރައްޔިތުންނަށް މިހާރު އެނގޭ އަދުލު އިންސާފު ފުޑާލައިފި، އެއްޖިންސުން ގުޅުން ހިންގުން، ވައްކަން މިހެން ގޮސް ހުރިހާ ނަހީއެއް ތަންމިނަށް ހުޅުވާފަ މިފަހަރު ވޯޓުން ތިކަން ރަނގަޅަށް ދައްކާނެ.