ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު، ރ. އިނގުރައިދޫގެ ފެނާއި ނަރުދަމާގެ ނިޒާމްގެ ހިދުމަތާއި އެއަތޮޅު އިންނަމާދޫގެ ފެނުގެ ނިޒާމްގެ ހިދުމަތް ރަސްމީކޮށް ފަށްޓަވައިދެއްވައިފިއެވެ.
ރައީސް މިހިދުމަތްތައް ފަށްޓަވައި ދެއްވީ އެމަނިކުފާނު މިހާރު، ރ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު މެންދުރު ކުރީގައެވެ.
އިނގުރައިދޫގެ ފެނާއި ނަރުދަމާ ނިޒާމް ގާއިމްކޮށްފައި ވަނީ، އަލްޓެކް މޯލްޑިވްސް ޕްރައިވެޓް ލިމިޓެޑާއި ހަވާލު ކޮށްގެންނެވެ. އަދި، އިންނަމާދޫގެ ފެނުގެ ނިޒާމް ގާއިމްކޮށްފައި ވަނީ، އެމްޑަބުލިޔުއެސްސީ އާ ހަވާލު ކޮށްގެންނެވެ.
ރ އަތޮޅަށް ކުރައްވަމުން ގެންދަވާ ދަތުރުފުޅުގައި ރ. މަޑުއްވަރި އަދި ދުވާފަރުގައި ސަރުކާރުން ހިންގާފައިވާ ތަރައްގީގެ ބައެއް މަޝްރޫޢުތަކުގެ ނިމުން ވެސް ރައީސް ސޯލިހު ވަނީ ފާހަގަ ކޮށްދެއްވާފައެވެ.
މިގޮތުން މަޑުއްވަރީއަށް ވަޑައިގެން ރައީސް ވަނީ އެރަށު ބަނދަރު ހުޅުއްވައިދެއްވާފައެވެ. އަދި ދުވާފަރަށް ވަޑައިގެން އެމަނިކުފާނު ވަނީ އެރަށުގެ ބިން އިތުރުކުރުގެ މަޝްރޫއުގެ ނިމުން ފާހަގަކޮށްދެއްވާ މަގުހެދުމުގެ މަޝްރޫއުގެ ނިމުން ފާހަގަކޮށްދެއްވާ އަދި އެރަށު ފުޓްބޯޅަ ދަނޑު ވެސް ހުޅުއްވައިދެއްވާފައެވެ.
ރައީސް އޮފީހުން ބުނީ، އަތޮޅުތަކުގެ ރަށްރަށުގެ ރައްޔިތުންނަށް ސާފުބޯފެނާއި ރައްކާތެރި ނަރުދަމާގެ ހިދުމަތް ގާއިމްކޮށްދިނުމުގެ މަޝްރޫއުތަކަކީ، މިސަރުކާރުގެ މިދައުރުގެ ތެރޭގައި އެންމެ އިސްކަންދީގެން ހިންގާފައިވާ މަޝްރޫއުތަކެއް ކަމަށެވެ.
މީގެ އިތުރުން، އަތޮޅުތަކުގެ ރަށްރަށުގައި އަސާސީ ހިދުމަތްތައް ގާއިމްކޮށް، ރައްޔިތުންގެ ދިރިއުޅުމުގެ ފެންވަރު މަތިކުރުމަށްޓަކައި، ސަރުކާރުން އަތޮޅުތަކުގެ ރަށްރަށުގައި އުމުރާނީ ތަރައްގީގެ ވަރަށް ގިނަ މަޝްރޫއުތައް ހިންގާފައިވާ ކަމަށް ރައީސް އޮފީހުން ބުނެއެވެ. އަދި ފަހުރުވެރި، އަބުރުވެރި ދިރިއުޅުމެއް އުޅެވޭނެހެން މަގުފަހިކުރުމަށް ރާއްޖޭގެ ރަށްރަށުގެ ތަރައްގީއަށް ސަރުކާރުން ގިނަ ގުނަ މަސައްކަތްތަކެއް ކުރަމުންދާ ކަމަށް ރައީސް އޮފީހުން ވަނީ ބުނެފައެވެ.
