ކުރީގެ ރައީސް އަބްދުﷲ ޔާމީން ވެރިކަން ކުރެއްވި ގޮތަކީ ހަނދާނުން ނައްތާލައިގެންވާނެ ގޮތެއް ނޫން ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އަންނަ ރިޔާސީ އިންތިހާބުގެ ކެމްޕެއިނަށް މިއަދު ނ. ފޮއްދުއަށް ވަޑައިގެން އެ ރަށުގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ މީގެ 5 އަހަރު ކުރިއާ އަޅާބަލާއިރު ރާއްޖެއަށް އައިސްފައިވާ ބަދަލު ފެންނާނެ ކަމަށާއި 2013 އިން 2018 އާ ދެމެދު ވެރިކަން ކުރެއްވި ފަރާތުން ކަންކުރައްވަމުން ގެންދެވި ގޮތް އެއީ ހަނދާނުން ނައްތާލައިގެން ވާނެ ގޮތެއް ނޫން ކަމަށެވެ.
އިދިކޮޅުގެ ކެންޑިޑޭޓަށް އިޝާރާތް ކުރައްވާ ރައީސް ސޯލިހު ވިދާޅުވީ މިއަދުވެސް ނިކުމެ ވަޑައިގެން ތިއްބެވި ކަމަށާޢި ބޭނުންވަނީ ވެރިކަމަށް ވަޑައިގަންނަން ކަމަށާއި އެހެންނަމަވެސް އެ ބޭފުޅުންނަށް ރާއްޖޭގެ ވެރިކަން ހަވާލުވެއްޖެނަމަ ކަންވެގެންދާނެ ގޮތް ވިސްނާ ފިކުރު ކުރަން ޖެހޭ ކަމަށެވެ. އަދި ރައީސް ޔާމީން ވެރިކަން ކުރެއްވީ ބާރުގެ ބޭނުން ކުރައްވައިގެން ކަމަށާއި ހިޔާލު ތަފާތުވާ ކޮންމެ މީހަކަށް ޖެހުނީ ޖަލުގެ ކުޑަ ގޮޅި ހިޔާރުކުރަން ކަމަށް ރައީސް ސޯލިހު ވިދާޅުވިއެވެ.
ރައީސް ސޯލިހު ވިދާޅުވީ އަނެއްކާވެސް މިފަދަ ކުދިކުދި ރަށްތައް އެކަހެރިވެ، ބާކީވެގެން ހިނގައިދާނެ ކަމުގެ ބިރު އެބައޮތް ކަމަށާއި މި ސަރުކާރުން ފެށި މަސައްކަތްތައް އަނެއްކާވެސް ހުއްޓުމަކަށް އައިސް ރައްޔިތުން ބިކަވެ ހާލުގައި ޖެހޭތަން ދެކޭކަށް އެއްވެސް މީހަކު ބޭނުމެއް ނުވާނެ ކަމަށެވެ.
2018 ވަނަ އަހަރު ރިޔާސީ އިންތިހާބުގައި ފޮއްދުއަށް ވަޑައިގެންކަން ފާހަގަކުރައްވާ ރައީސް ސޯލިހު ވިދާޅުވީ ފޮއްދޫ އޭރު އޮތް ގޮތާއި މިހާރު ފެންނަ މަންޒަރާ ވަރަށް ބޮޑަށް ތަފާތުވެއްޖެ ކަމަށެވެ. އަދި އެ ބަދަލަކީ އެ ދުވަހު ހިއްޕަވައިގެން ނިކުމެވަޑައިގަތް ޖަޒީރާ ރާއްޖޭގެ ތަސައްވުރާއެކު ގެނެވުނު ބަދަލުތައް ކަމަށް ވެސް ރައީސް ސޯލިހު ވިދާޅުވިއެވެ.
ރައީސް ސޯލިހު އިތުރަށް ވިދާޅުވީ ނ އަތޮޅުގެ ކޮންމެ ރަށަކުންވެސް ފެންނަނީ މި ބަދަލާއެކީގައި އުފާވެރި އަމާން ރާއްޖެއެއް ހޯދުމަށް ބޭނުންވެފައި އޮތް މިންވަރު ކަމަށެވެ. އަދި ހާއްސަކޮށް އެމްޑީއޭއާއި އެމްޑީއޭގެ ރައީސް އަހުމަދު ސިޔާމް ކޯލިޝަންގެ ތެރޭގައި ހުންނެވުމުން އެ ޔަގީންކަން ނ. އަތޮޅުން އިތުރަށް ކަށަވަރު ވެގެންދާ ކަމަށް ރައީސް ސޯލިހު ވިދާޅުވިއެވެ.
