އިދިކޮޅުގެ ޕާޓީ ޕީޕީއެމުން ކެންޑިޑޭޓެއް ނުނެރުމުން ނުރުހުން ފާޅުކުރައްވައި އެ ޕާޓީން ވަކިވެވަޑައިގަތް ކުރީގެ ރައީސް ޑރ. މުހައްމަދު ވަހީދު ހަސަން ޖުމްހޫރީ ޕާޓީ އާ ގުޅިވަޑައިގެންފިއެވެ.
މިރޭ އދ. މާމިގިލީގައި ބާއްވަމުން ގެންދާ ޖޭޕީގެ ޖަލްސާގައި ވަހީދު ޖޭޕީއަށް ސޮއިކުރެއްވުމަށް ފަހު އެމަނިކުފާނު ވަނީ ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހިމް އަށް ސަޕޯޓް ދިނުމަށް ޕީޕީއެމްގެ މެންބަރުންނަށް ގޮވާލައްވައިފައެވެ.
ވަހީދު ވިދާޅުވީ ގާސިމްގެ އަރިހުގައި ހުންނަވައިގެން އޭނާއަށް އެހީތެރިކަމެއް ފޯރުކޮށްދެއްވަން ލިބިވަޑައިގެންފައި ވާތީ އެކަމާ ވަރަށް ހިތްހަމަ ޖެހިވަޑައިގަންނަވާ ކަމަށެވެ. އަދި ވޭތުވެދިޔަ ހަފްތާއެއްހާ ދުވަހުގެ ތެރޭގައި ވަހީދުގެ ސިޔާސީ މުސްތަގުބަލާ ގުޅޭގޮތުން ފެތުރެމުން ދިޔަ ވާހަކަތަކަށް އަލިއަޅުވާލައްވާ އެމަނިކުފާނު ވިދާޅުވީ އޭރު ހުންނެވީ ބޮޑު ޕާޓީއެއްގައި ކަމަށާއި އެހެންނަމަވެސް އެ ޕާޓީގައި ޑިމޮކްރަސީ ނެތުމުގެ ސަބަބުން އެއްވެސް މީހަކު ރިޔާސީ އިންތިހާބަށް ނުކުތުމުގެ ފުރުސަތު ދީފައި ނުވާ ކަމަށެވެ.
މަގުމަތި ވި ވާހަކަ ނުދައްކަވާނެ ކަމަށް ވިދާޅުވެ އެމަނިކުފާނު ވިދާޅުވީ، ރިޔާސީ އިންތިހާބުގައި ޕީޕީއެމްގެ ކުލަވެސް، ކެންޑިޑޭޓެއްވެސް ނެތް ކަމަށާއި އެމަނިކުފާނު މަގުމަތިވެވަޑައިގެންފި ނަމަ ޕީޕީއެމްގެ 40،000 މެންބަރުން ވެސް މަގުމަތިވެއްޖެ ކަމަށެވެ. އަދި މިއަދު ބަލަން ޖެހޭނީ މީހަކަށް ނޫން ކަމަށާއި ބަލަން ޖެހޭނީ ގައުމަށް ކުރިމަތިވެފައި ހުރި ކަންތައްތަކުން ސަލާމަތް ވުމަށްޓަކައި އެޅޭނެ ފިޔަވަޅުތަކަށް ކަމަށް ވެސް ވަހީދު ވިދާޅުވިއެވެ.
ކުރީގެ ރައީސް އަބްދުﷲ ޔާމީންގެ އެޑްވައިޒަރުކަން ކުރެއްވި ވަހީދު 10 އަހަރަށް ފަހު ޕީޕީއެމުން ވަކިވެވަޑައިގަތީ، އަންނަ އިންތިހާބުގައި ވާދަކުރެއްވުމަށް އިލެކްޝަންސް ކޮމިޝަނަށް ހުށަހެޅުމަށް ލިޔެކިއުންތައް ތައްޔާރު ކުރައްވައި، ކުށުގެ ރެކޯޑު ވެސް ސާފުކުރެއްވުމަށް ފަހު، ފަހު ވަގުތަށް މަޑުކުރެއްވުމަށް ފަހުގައެވެ.
މީގެ ކުޑަ ދުވަސްކޮޅެއް ކުރިން ވަހީދު ޖުމްހޫރީ ޕާޓީގެ ލީޑަރު އަދި އެ ޕާޓީގެ ކެންޑިޑޭޓު ގާސިމް އިބްރާހިމާ ބައްދަލުކުރައްވާފައި ވެއެވެ. ފާހަގަކުރެވޭ ގޮތުގައި ޕީޕީއެމުން ވަކިވެވަޑައިގެންނެވުމުގެ ކުރިން، ގާސިމަށް ތާއީދުކުރައްވާ، ސޯޝަލް މީޑިއާ ޕްލެޓްފޯމް އެކްސްގައި ކޮށްފައި ހުރި ބައެއް ޕޯސްޓުތައް ރީޕޯސްޓު ވެސް ކުރައްވާފައި ވެއެވެ.
ޕީޕީއެމުން ވަކިވެވަޑައިގަތްކަން އެންގުމަށް ފޮނުއްވި ސިޓީގައި ވަހީދު ވިދާޅުވީ، ޔާމީންގެ ޝަރުތު ހަމަނުވާ ކަމަށް އިލެކްޝަންސް ކޮމިޝަނުން ނިންމި ނިންމުން ސުޕްރީމް ކޯޓުން ދެމެހެއްޓުމާއި އިންތިހާބަށް ކުރިމަތިލުމުގެ ފަހު ދުވަހާ ދެމެދު ޕީޕީއެމުން ކެންޑިޑޭޓެއް ނެރުމުގެ ފުރުސަތު އޮތް ކަމަށެވެ. ނަމަވެސް ޕީޕީއެމްގެ ލީޑާޝިޕުން އެކަމަށް އެއްވެސް މަސައްކަތެއް ނުކޮށް ކުޑަ ޕާޓީއަކުން ކެންޑިޑޭޓެއް ނެރުމަކީ އެ ޕާޓީން ވީ ހިޔާނާތެއް ކަމަށެވެ.
ޔާމީނަށް އިންތިހާބުގައި ވާދަކުރެއްވުމަށް ފުރުސަތު ގެއްލުމުން، ޔާމީންގެ ދެވަނަ ޕާޓީ ކަމަށްވާ ޕީއެންސީން ފަހު ވަގުތު ނެރެފައި ވަނީ މާލޭގެ މޭޔަރު ޑރ. މުހައްމަދު މުއިއްޒެވެ.
ޥެރިކަމައިގެން މީނާވެސް މިހުރި ހަލާކުވަނީ ބޯހުރި މީހަކަށްވިއްޔާ އެނގެން ޖެހޭނެ ޕީޕީއެމްގެ ރިޔާސީ ޓިކެޓް ވަހީދަށް ނުދޭނެކަން ޔާމީނަށް ކުރިމަތި ނުލެވުނަސް ދެން ގާސިމް ފަހަތަށް ޕީޕީއެމް އަރަން ބުނާއިރު މަހިތުން ފުރަތަމަ ބުރުންވެސް ޕީޕީއެމް އަށްވުރެ މަދުވޯޓް ޖޭޕީއަށް ލިބޭނީ. އަފި ވަހީދު ތިޔަޕާޓީއާ ގުޅުނީމަވެސް ލިބޭ ވޯޓް މަދުވާނެ. ތިމާމީހާއަށް ހީވަނީ ރައްޔިތުންގެ ސަޕޯޓް ވަރަށް އޮވެޔޭ. ކުށް ހީއެއް.ވަހީދު ތިޔޔަ ޕާރޓީއާ ގުޅުނީމަ އިތުރުވާނީ ދެވޯޓް އިލްހާމާ ވަހީދުގެ ވޯޓް