ހުޅުމާލެއިން ވަގަށް ނަގާފައިވާ ހަތަރުލައްކަ ރުފިޔާއަށްވުރެ ގިނަ ރުފިޔާގެ އަގުހުރި ތަކެތި ފުލުހުން ހޯދައިފިއެވެ.
ފުލުހުން ބުނީ ހުޅުމާލެ ފޭސް 1ގެ ޕޮލިސް ސްޓޭޝަނަށް ހުށަހަޅާފައިވާ ވައްކަމުގެ މައްސަލަތަކުގައި ހިމެނޭ ބައެއް ތަކެތި ހޯދައި އެތަކެތީގެ ވެރިފަރާތްތަކާއި ހަވާލުކޮށްފައިވާ ކަމަށެވެ.
ހުޅުމާލެ ފޭސް 1 ޕޮލިސް ސްޓޭޝަނުން ކުރިއަށް ގެންދިޔަ އޮޕަރޭޝަންތަކުގައި ހޯދާފައިވަނީ މިދިޔަ ޖުލައި މަހު އެ ސްޓޭޝަނަށް ހުށަހަޅާފައިވާ ވައްކަމުގެ މައްސަލަތަކުގައި ހިމެނޭ ތަކެތި ކަމަށާއި އޭގެ ތެރޭގައި މޯބައިލް ފޯނާއި، ބައިސްކަލާއި ސައިކަލުގެ އިތުރުން އެހެނިހެން ތަކެތި ހިމެނޭ ކަމަށެވެ.
ފުލުހުން ބުނިގޮތުގައި މި ތަކެތީގެ އަގު 449936 ރުފިޔާ އަށް އަރައެވެ. މިމައްސަލަތަކާއި ގުޅިގެން މިހާތަނަށް އެއްވެސް މީހަކު ހައްޔަރު ކުރިކަމެއް ނުވަތަ ނޫން ކަމެއް ފުލުހުން ސާފުކޮށެއް ނުދެއެވެ.
މާލެ ސަރަހައްދާއި އަތޮޅުތެރޭގައި ވައްކަން ކުރާ މިންވަރު އިތުރުވަމުންދާއިރު ވަގަށް ނަގާ މިފަދަ އަގުހުރި ތަކެތި ހޯދުމުގައި ގިނަފަހަރު ދަތިތަކެއް ކުރިމަތިވާ ކަމަށް ފުލުހުން ވަނީ މީގެ ކުރިން ބުނެފައެވެ.
