ލޮނުގަނޑުގައި ނަޖިހުގެ އަސަރު އިތުރުވުމާ ގުޅިގެން ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ އެންގުމަށް މާލޭ ސުވިމިން ޓްރެކް ބަންދުކުރުމަށް ނިންމާފައި ވާކަމަށް ސުވިމިން އެސޯސިއޭޝަން އޮފް މޯލްޑިވްސް އިން ބުނެފިއެވެ.
އެ އެސޯސިއޭޝަނުން ބުނީ މާލެ ސްވިމިން ޓްރެކު ސަރަހައްދުން ލޮނު ނަގައި، އެންމެ ފަހުން ހެދި ޓެސްޓުތަކުން ސުވިމިން ޓްރެކް ލޮނުގަނޑުގައި ނަޖިހުގެ އަސަރު އިތުރުވެފައި ވާކަމަށް ދައްކާ ކަމަށެވެ. މޫސުމީ ބަދަލުތަކާއެކު މާލޭ ސުވިމިން ޓްރެކް ލޮނުގަނޑުގައި ނަޖިހުގެ އަސަރު އިތުރުވެފައި ވާކަން ފާހަގަކޮށް އެ އެސޯސިއޭޝަނުން ބުނީ މިވަގުތު އެސަރަޙައްދަށް މޫދަށް އެރި އުޅުމަކީ ރައްކާތެރިކަމެއް ނޫން ކަމަށް އެޗްޕީއޭ އިން އަންގަވާފައި ވާކަމަށެވެ.
އެހެންކަމުން ސުވިމިން އެސޯސިއޭޝަނުން ވަނީ މިއަދު ހެނދުނުން ފެށިގެން އެ ސަރަހައްދުގެ މޫދަށް އެރިއުޅުން މަނާކޮށްފައެވެ. އަދި ސުވިމިން ޓްރެކް ބަންދު ކުރުމުން އެ ސަރަހައްދު ބޭނުންކުރާ ފަރާތްތަކަށް ދިމާވާނެ ދަތިތަކަށް އެ އެސޯސިއޭޝަނުން ވަނީ މައާފަށް އެދިފައެވެ.
މީގެ އިތުރުން އެ އެސޯސިއޭޝަނުން ބުނީ ކަމާބެހޭ ފަރާތްތަކުން ދުވަހުން ދުވަހަށް އެ ސަރަހައްދުގެ މޫދު ލޮނުގަނޑު ޓެސްޓުކޮށް، ނަތީޖާ ބަލަމުން ދާކަމަށެވެ. އަދި މޫދަށް އެރިއުޅުމަށް ރައްކާތެރިކަން ލިބުމާއެކު ޓްރެކް ހުޅުވާލާނެ ކަމަށް ވެސް ވަނީ ބުނެފައެވެ.
މާލޭގެ ގިނަ ބަޔަކު ބޭނުން ކުރަމުން އަންނަ ސުވިމިން ޓްރެކް އިތުރަށް ތަރައްގީކުރުމަށް ސުވިމިން އެސޯސިއޭޝަނުން ގިނަ މަސައްކަތްތަކެއް ކުރަމުން އަންނައިރު އެ އެސޯސިއޭޝަނުން ވަނީ 2021 ވަނަ އަހަރުގެ ތެރޭގައި އެ ތަނުގައި ޑައިވިން ޕްލެޓްފޯމާއި ސްލައިޑެއް ބަހައްޓާފައެވެ.
