މި އަންނަ މަހު ބާއްވާ ރިޔާސީ އިންތިހާބުގައި އިދިކޮޅު ޕީއެންސީގެ ރިޔާސީ ކެންޑިޑޭޓް އަދި މާލެ ސިޓީ ކައުންސިލް ޑރ. މުހައްމަދު މުއިއްޒުގެ ރަނިން މޭޓަކަށް ހަމަޖެއްސެވި ފަރެސްމާތޮޑާ ދާއިރާގެ މެމްބަރު ހުސައިން މުހައްމަދު ލަތީފް (ސެންބެ) އަށް ރައީސް އިބްރާހިމް މުހައްމަދު ސޯލިހު މަރުހަބާ ދަންނަވައިފިއެވެ.
މިހާރު ހުވަދު އަތޮޅަށް ކުރައްވަމުން ގެންދަވާ ކެމްޕެއިން ދަތުރުފުޅުގައި މިއަދު ގދ. ފަރެސްމާތޮޑާއަށް ވަޑައިގެން ވާހަކަފުޅު ދައްކަވަމުން ރައީސް ސޯލިހު ވިދާޅުވީ މިއަހަރުގެ ރިޔާސީ އިންތިހާބުގައި ފަރެސްމާތޮޑާއަށް ނިސްބަތްވެ ވަޑައިގަންނަވާ ބޭފުޅަކު ވާދަކުރައްވާ ކަމަށެވެ. އަދި ހުސައިންއަކީ މިހާރުވެސް ވާހަކަދައްކާ ރައްޓެއްސެއް ކަމަށް ރައީސް ސޯލިހު ވަނީ ވިދާޅުވެފައެވެ.
ރައީސް ސޯލިހު ވިދާޅުވީ އެދުމަކީ ކުރިއަށް އޮތް އިންތިހާބުގައި ޑިމޮކްރެޓިކް ހަމަތަކާ އުސޫލުތަކުގެ ތެރެއިން ވާދަވެރި އިންތިހާބެއްގެ ގޮތުގައި މަސްލަހަތު ނުގެއްލޭ ގޮތުގައި ކުރިއަށް ދިއުން ކަމަށެވެ. އަދި ފަރެސްމާތޮޑާއިން އެ މަންޒަރު ފެނިވަޑައިގަންނަވާ ކަމަށާއި ސިޔާސީ ހަރަކާތްތައް ހިންގަން ހުރިހާ ޕާޓީއަކަށް ޖާގަ އޮތްތައް ފެނިވަޑައިގަންނަވާ ކަމަށް ރައީސް ސޯލިހު ވިދާޅުވިއެވެ.
ރައީސް ޔާމީންއަށް ރިޔާސީ އިންތިހާބުގައި ވާދަ ނުކުރެއްވޭނެ ކަމަށް މިދިޔަ ހަފްތާގެ އަންގާރަ ދުވަހު އީސީއިން ނިންމާފައި ވަނީ ވ. އާރަށް ކުއްޔަށް ދިން މައްސަލައިގައި ރިޝްވަތު ހިފުމާއި މަނީ ލޯންޑަރިންގެ ކުށް ސާބިތުވެ 11 އަހަރުގެ ޖަލު ހުކުމެއްގައި ހުންނެވުމުގެ ސަބަބުންނެވެ. އެ ކޮމިޝަނުން އެހެން ނިންމާފައި ވަނީ، ރައީސް ޔާމީންގެ މައްޗަށް ޖަލު ހުކުމެއް އޮތުމާއެކު ގާނޫނުއަސާސީގެ 109 ވަނަ މާއްދާ އަށް ރިއާޔަތް ކުރުމަށް ފަހުއެވެ. އެ މާއްދާގައިވާ ގޮތުން، ރައީސް ކަމަށް ކުރިމަތިލެވޭ މީހަކީ 12 މަސް ދުވަހަށް ވުރެ ދިގު މުއްދަތެއްގެ ހުކުމެއް ތަންފީޒު ކުރަމުންދާ މީހަކަށް ވެގެނެއް ނުވާނެއެވެ. އީސީގެ މި ނިންމުމަކީ ރަނގަޅު ނިންމުމެއް ކަމަށް ސްޕްރީމް ކޯޓުން ވެސް ވަނީ ނިންމާފައެވެ.
އެއާއެކު "ބެކަޕް" ކެންޑިޑޭޓެއްގެ ގޮތުގައި ޕީއެންސީގެ ރިޔާސީ ޓީކެޓް މުއިއްޒު ކާމިޔާބު ކުރައްވާފައި ވަނީ އާދަމް ޝަރީފާ ވާދަކުރައްވައި 2 ވޯޓުގެ ތަފާތުންނެވެ. މުއިއްޒުއަށް 25 ވޯޓު ލިބިވަޑައިގެންފައި ވާއިރު އާދަމް ޝަރީފަށް ލިބިވަޑައިގަތީ 23 ވޯޓެވެ. މުއިއްޒުގެ ރަނިންމޭޓަކަށް ކަނޑައަޅާފައި ވަނީ ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް (ސެންބެ) އެވެ.
