އަލަށް އުފެއްދި "ދަ ޑިމޮކްރެޓްސް" ގެ ސަރުކާރެއްގައި އައްޑު އަށް ވަރަށް ބޮޑަށް އިސްކަން ދެއްވާނެ ކަމުގެ ޔަގީންކަން، ކުރިއަށް އޮތް ރިޔާސީ އިންތިހާބުގައި އެ ޕާޓީން ވާދަކުރައްވާ ކެންޑިޑޭޓު އިލްޔާސް ލަބީބު ދެއްވައިފިއެވެ.
ރިޔާސީ އިންތިހާބުގައި ޑިމޮކްރެޓްސްގެ ފަރާތުން ވާދަކުރައްވާ އިލްޔާސް ތާއީދު ހޯއްދެވުމަށްޓަކައި އައްޑު އަށް ވަޑައިގަތުމުން، އައްޑޫގެ ގަން އިންޓަނޭޝަނަލް އެއާޕޯޓުން ވަނީ ހޫނު މަރުހަބާ އެއް ކިޔާފައެވެ. އިލްޔާސަށް ކެމްޕެއިން ކޮށްދެއްވުމަށްޓަކައި، އޭނާ އާ އެކު ޑިމޮކްރެޓްސް އާ ދާދިފަހުން ގުޅިވަޑައިގަތް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ވަނީ އައްޑު އަށް ވަޑައިގެންފައެވެ.
ނޫސްވެރިންގެ ސުވާލުތަކަށް ޖަވާބުދެއްވަމުން އިލްޔާސް ވިދާޅުވީ، އައްޑޫގެ ރައްޔިތުން ތިބީ ސަރުކާރާ މެދު ނުރުހިފައިކަން އެނގިވަޑައިގަންނަވާ ކަމަށެވެ. އޭނާ ވިދާޅުވީ، އައްޑޫގައި ހިންގާ ކެމްޕެއިން ހަރަކާތްތަކުގެ ދަށުން މިރޭ އެ ސިޓީގެ ފޭދޫގައި ދިރިއުޅޭ ރައްޔިތުންނާ ބައްދަލުކުރައްވައި، މާދަމާ މަރަދޫ ފޭދު އާއި މަރަދު އާއި ހުޅުދު އާއި ހިތަދޫގެ ރައްޔިތުންނާ ބައްދަލުކުރެއްވުމަށް ފަހު، އޭގެ އަނެއް ދުވަހު ފޭދު އާއި ހިތަދޫގައި ދޮރުން ދޮރަށް ހިންގަވާނެ ކަމަށެވެ.
ހުޅުދޫ ދާއިރާގެ މެންބަރުކަން ކުރައްވާ އިލްޔާސް ވަނީ، އަންނަ ސެޕްޓެމްބަރު މަހު ބާއްވާ އިންތިހާބު ކާމިޔާބުކުރައްވާނެ ކަމުގެ ޔަގީންކަން ދެއްވާފައެވެ.
އޭނާގެ ކެމްޕެއިނާ ގުޅޭގޮތުން އިތުރު މައުލޫމާތު ދެއްވަމުން އިލްޔާސް ވިދާޅުވި ގޮތުގައި:
- ކެމްޕެއިން ދަތުރުތައް އެކި ރަށްރަށަށް ވަނީ ރޭވިފައި
- ޑިމޮކްރެޓްސްގެ ޓީމުތަކުން ރަށްރަށަށް ގޮސް އެ ޕާޓީގެ ސިޔާސަތުތައް ކިޔައިދީ އޮޅުންފިލުވައިދޭނެ
- ރައްޔިތުންގެ ކަންބޮޑުވުންތަކާ ބެހޭ ވޯކްޝޮޕްތައް ރަށްރަށުގައި ކުރިއަށް ގެންދާނެ
އަމިއްލަ އުފަން ސިޓީ ކަމަށްވާ އައްޑު އަށް ޑިމޮކްރެޓްސްގެ ސަރުކާރެއްގައި ރާވާފައި ހުރި ކަންކަމާ ގުޅޭ ގޮތުން ވާހަކަ ދައްކަވަމުން އިލްޔާސް ވިދާޅުވީ، އޭނާގެ ސަރުކާރެއްގައި އައްޑޫގެ އިގްތިސޯދަށް ހެޔޮ ބަދަލުތަކެއް ގެންނާނެ ކަމަށާއި، އޭގެ ތެރޭގައި އެ ސިޓީގެ ބަނދަރާއި އެއާޕޯޓު ތަރައްގީކޮށް، ފަތުރުވެރިކަމާއި ކުދި އަދި މެދު ފަންތީގެ ވިޔަފާރިތައް ކުރިއަރުވައި ކޮޅަށް ޖެހުން ހިމެނޭ ކަމަށެވެ.
އޭނާ އަށް ވެރިކަން ލިބިވަޑައިގަތުމުން، އައްޑު އަށް ކަނޑައަޅާފައިވާ ސިޔާސަތުތައް އެއް އަހަރާއި ދެ އަހަރާ ދެމެދުގެ މުއްދަތެއްގައި ތަންފީޒު ކުރެވޭނެ ކަމުގެ ޔަގީންކަން އިލްޔާސް ދެއްވިއެވެ.
"އަޅުގަނޑުމެންގެ އެކަން ކުރެވޭނެ ގާބިލުކަން އެބަހުރި، އެކަން ކުރަން އެބަ އެނގޭ، އެކަމުގެ ނޯ ހައު އެބަ އެނގޭ، އެކަން ކުރަން ބޭނުންވާ ފައިސާ ހޯދޭނެ ގޮތް ވެސް އަޅުގަނޑުމެންނަށް އެބަ އެނގޭ،" އިލްޔާސް ވިދާޅުވިއެވެ.
ރިޔާސީ އިންތިހާބަށް ކުރިމަތިލެއްވީ އިލްޔާސް ވިދާޅުވި ގޮތުގައި، އައްޑޫގެ ރައްޔިތުން ބޭނުންވާ އިގްތިސޯދީ ކުރިއެރުމާއި އިޖުތިމާއީ ކުރިއެރުމުގެ އިތުރުން، ތަރައްގީ ރައްޔިތުންނަށް ހޯއްދަވައި ދެއްވުމުގެ ބޭނުމުގައެވެ.
ސެޕްޓެމްބަރު މަހުގެ ނުވަވަނަ ދުވަހު ބާއްވާނެ ކަމަށް އިއުލާނުކުރި އިންތިހާބަށް ކެންޑިޑޭޓަކު ނެރޭނެ ކަމަށް ހާމަކުރި "ދަ ޑިމޮކްރެޓްސް" އިން މި މަހުގެ 20 ގައި ރިޔާސީ ޕްރައިމަރީ އަށް ހުޅުވާލި ފުރުސަތުގައި ޕްރައިމަރީ އަށް ކުރިމަތިލެއްވީ އިލްޔާސް އެކަންޏެވެ. އެހެންކަމުން އިއްޔެ ނެގި ފެންނަ ނުފެންނަ ވޯޓުން ދައްކާ ގޮތުން، ވޯޓުލީ 3،203 މެންބަރުންގެ ތެރެއިން 3،041 މެންބަރުން ވޯޓު ދިނީ އިލްޔާސް އިންތިހާބަށް ނެރެން ފެންނަ ކަމަށެވެ.
