މެޓާއިން އަލަށް ތައާރަފުކުރި ތްރެޑްސް އެޕްލިކޭޝަނުންވެސް ދުވާލަކަށް ފެންނަ ޕޯސްޓުތަކުގެ އަދަދު ލިމިޓް ކުރަން ނިންމައިފިއެވެ.
މި ބަދަލު ގެންނަން ނިންމި ސަބަބު ހާމަކުރަމުން ތުރެޑްސް ހިންގާ އިންސްޓަގްރާމްގެ ސީއީއޯ އާދަމް މޮސަރީ ބުނީ އެހެން އެޕްލިކޭޝަންތަކެކޭ އެއްފަދައިން ތްރެޑްސް އަށް ވެސް ސްޕޭމް އެޓޭކްތައް އަންނަމުން ދާ ކަމަށާ އެހެންކަމުން އެކަމަށް އެކަށީގެންވާ ހައްލެއް ހޯދުމުގެ ގޮތުން ބައެއް ޔޫޒަރުންނަށް ޕޯސްޓް ފެންނަ އަދަދު ލިމިޓްކުރަން ނިންމާފައިވާ ކަމަށެވެ.
މި އެޕާއެކު އެންމެ ބޮޑު އަސަރެއްކުރި ޓުވިޓާގެ ވެރިޔާ އީލޮން މަސްކު ކުރި ޓުވިޓެއްގައި ބުނީ އަނެއްކާ ވެސް ތުރެޑްސްއިން ޓުވިޓާ ކޮޕީ ކޮށްފައިވާކަމަށެވެ.
މެޓާގެ އައު ސޯޝަލް މީޑިއާ އެޕް "ތްރެޑްސް" ރިލީޒްކުރީ މި މަހުގެ 06 ވަނަ ދުވަހުއެވެ. ތްރެޑްސް އަކީ ޓްވިޓާ އާ އެއްގޮތް ގިނަ ފީޗާތަކެއް ހިމެނޭ އެޕްލިކޭޝަނެކެވެ. ތްރެޑްސް މެދުވެރިކޮށް ލިޔާ ޕޯސްޓްތަކުގައި ގިނަވެގެން 500 ކެރެކްޓާ ބޭނުން ކުރެވޭއިރު މި އެޕްލިކޭޝަންގައި ފޮޓޯ އާއި ފަސް މިނިޓަށްވުރެ ދިގު ނޫން ވީޑިއޯތައް ހިއްސާކުރެވޭނެއެވެ.
މެޓާގެ ސީއީއޯ މާކް ޒަކަބާގް ބުނީ މިއީ ވަރަށް ކާމިޔާބު އެޕެއްކަމަށާ އަދި މިއީ ޔޫޒާ ފްރޭންޑްލީ އެޕެއްކަމަށް ގިނަ ބަޔަކު ގަބޫލުކުރާކަމަށެވެ. މި އެޕް ޓުވިޓާ އަށްވުރެ ކާމިޔާބު އެޕަކަށް ވެދާނެތޯ ބައެއް މީހުން ސުވާލުކުރަމުން އަންނައިރު ޒަކަބާގް ބުނީ އެހާ ހިސާބަށް ދާން އަދި ދުވަސް ނަގާނެކަމަށާ، އެކަމަށް އުއްމީދުކޮށް މަސައްކަތްކުރަމުން ދާ ކަމަށެވެ.
