ދާއިމީ މަގާމުތަކަށް މެންބަރުން އައްޔަނުކުރެވެންދެން، "ދަ ޑިމޮކްރެޓްސް" ހިންގާ ވަގުތީ ކައުންސިލަށް މެންބަރުން އައްޔަނުކޮށް، ޕާޓީ ހިންގުމަށް ވަގުތީ ކޮމިޓީތައް އެކުލަވާލައިފިއެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އަރިސް މެންބަރުން އިސްވެ އުފެއްދެވި ޑިމޮކްރެޓްސް އިން މިއަދު ކުރި އިއުލާނެއްގައި ބުނީ، އެ ޕާޓީގެ އަސާސީ ގަވައިދުގައި ބަޔާންކުރާ އޮނިގަނޑުގެ ތެރޭގައި ހިމެނޭ ދާއިމީ މަގާމުތަކަށް މެންބަރުން އައްޔަނުކުރެވެން ދެން، 20 މެންބަރުންގެ ވަގުތީ ކައުންސިލެއް އެކުލަވާލާފައިވާ ކަމަށެވެ.
އޭގެ ތެރޭގައި ހިމެނެނީ އެ ޕާޓީގެ މުއައްސިސް ކަނޑައަޅާ 12 މެންބަރަކާއި، ޕާޓީން ބޭއްވި ކައުންސިލް ބައްދަލުވުމުގައި ބައިވެރިވި މެންބަރުން ފާސްކޮށް އައްޔަނުކުރި ފަންނީ އަށް މެންބަރުންނެވެ.
އޭގެ އިތުރުން، ޑިމޮކްރެޓްސްގެ ނަމުގައި މާލީ މުއާމަލާތްތައް ކުރުމަށް ބޭނުންވާ ލިޔެކިއުންތަކުގައި ސޮއިކުރާނެ ފަރާތްތައް ކަނޑައެޅުމަށް ފަސް މެންބަރުންގެ ކޮމިޓީއަކާއި، އެ ޕާޓީގެ ޕްރައިމަރީ އިއުލާނުކޮށް ކުރިއަށް ގެންދިއުމަށް ނެގޭ، އިންތިހާބާ ބެހޭ ތިން މެންބަރުންގެ ކޮމިޓީ އެއް އެކުލަވާލައި، ކުރިއަށް އޮތް އިންތިހާބަށް ޕާޓީގެ ފަރާތުން ހުށަހަޅާ މެނިފެސްޓޯ އެކުލަވާލުމުގެ މަސައްކަތް އިސްވެ ބަލަހައްޓަން ދެ މެންބަރަކު ކަނޑައަޅާފައިވާ ކަމަށް، އެ އިއުލާނުގައި ބުންޏެވެ.
ރޭ ބޭއްވި ޑިމޮކްރެޓްސްގެ ފުރަތަމަ ކައުންސިލް ބައްދަލުވުމުގައި ޑިމޮކްރެޓްސްގެ ވަގުތީ ޗެއާޕާސަން އަދި ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވީ، ސެޕްޓެމްބަރުގައި އޮންނަ އިންތިހާބުގައި އެ ޕާޓީގެ ފަރާތުން ވާދަކުރާ ކެނޑިޑޭޓެއް ހޮވުމަށް ބާއްވާ ޕްރައިމަރީގައި ވާދަކުރުމަށް މާދަމާ ފުރުސަތު ހުޅުވާލާނެ ކަމަށެވެ. ބެލެވޭ ގޮތުގައި ޑިމޮކްރެޓްސްގެ ޕްރައިމަރީގައި ނަޝީދު ވާދަނުކުރެއްވުން އެކަށީގެން ވެއެވެ.
އިލެކްޝަންސް ކޮމިޝަންގެ ދަފްތަރުގައި "ދަ ޑިމޮކްރެޓްސް" ރަސްމީކޮށް ރަޖިސްޓްރީވީ މިދިޔަ ބުދަ ދުވަހުގައެވެ.
