ކުރިއަށް އޮތް ރިޔާސީ އިންތިހާބުގައި ވާދަކުރައްވާ އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހިމް މުހައްމަދު ސޯލިހުގެ ކެމްޕެއިން ޝިއާރުގެ ގޮތުގައި "އުފާވެރި އަމާންރާއްޖެ" ހަމަޖައްސައިފިއެވެ.
ލޯގޯގެ ވަށައިގެން ރާއްޖޭގެ ރަށްތައް ހިމެނޭ ޗާޓު ހިމަނާފައިވާއިރު މެދުގައި ވަނީ "އުފާވެރި އަމާން ރާއްޖެ" ޖަހާފަ އެވެ. ކެމްޕެއިންގެ ޝިއާރު އިއުލާން ކުރުމާއެކު ރައީސަށް ތާއީދު ކުރާ ގިނަ ފަރާތްތަކުން ދަނީ ސޯޝަލް މީޑިއާގައި ބޭނުންކުރަން ފަށާފައެވެ.
ރައީސްގެ ކެމްޕެއިން ޝިއާރު މިހާރު އިއުލާން ކޮށްފައިވާއިރު ބޮޑު އީދު ބަންދަށްފަހު ރިޔާސީ އިންތިހާބުގެ ކެމްޕޭނަށް ރަސްމީކޮށް އަތޮޅުތަކަށް ދަތުރުތައް ފަށާނެ ކަމަށް އެމްޑީޕީން ވަނީ މީގެ ކުރިން އިއުލާން ކޮށްފައެވެ.
ރައީސް ސޯލިހް އެމްޑީޕީގެ ރިޔާސީ ޓިކެޓް ހޯއްދެވީ ރިޔާސީ ޕްރައިމަރީގައި އެމްޑީޕީގެ ކުރީގެ ރައީސް މުހައްމަދު ނަޝީދާއި ވާދަކޮށް ކުރި ހޯއްދަވައިގެންނެވެ. ޕްރައިމަރީން ނާކާމިޔާބުވެ ވަޑައިގަތުމަށްފަހު ނަޝީދު ވަނީ "ފިކުރެއްގެ ދިރުން" ނަމުގައި ވަކި ފެކްޝަނެއް އެމްޑީޕީގެ ތެރޭގައި ހަދައިގެން މަސައްކަތް ކޮށްފައެވެ.
ނަޝީދު އެމްޑީޕީން މިހާރު ވަކިވެވަޑައިގެންފައިވާއިރު އެމަނިކުފާނު މިހާތަނަށް އެއްވެސް ޕާޓީއަކާ ގުޅިވަޑައިގެންފައި ނުވެއެވެ. ނަމަވެސް ނަޝީދަށް ތާއީދު ކުރައްވާ ބޭފުޅުންތަކެއް އުފައްދަން މަސައްކަތް ކުރަމުންދާ ދަ ޑިމޮކްރެޓްސް ޕާޓީ އުފެއްދުމަށް ބާއްވާ ޖަލްސާގައި އެމަނިކުފާނުވެސް ބައިވެރިވެވަޑައިގަންނަވާނެކަން ހާމަކުރައްވާފައިވެއެވެ.
