"އިންޑިއާ އައުޓް" ހަރަކާތް ހިންގަންޏާ އިދިކޮޅު ޕްރޮގްރެސިވް ކޮންގްރެސް ކޯލިޝަނާ ގުޅިގެން މަސައްކަތްކުރަން ދަތިވާނެ ކަމަށް، "ދަ ޑިމޮކްރެޓްސް" އިން ބުނެފިއެވެ.

ރައީސް އިބްރާހީމް މުހައްމަދު ސޯލިހާއި ސަރުކާރު ނިމުމަކަށް ގެނައުމަށްޓަކައި ދެ ފަރާތުން ވެސް މަޝްވަރާ ބައްދަލުވުންތައް ފެށިތާ ދުވަސްކޮޅެއް ވީ ފަހުން ޕްރޮގްރެސިވް ކޮންގްރެސް ކޯލިޝަނުން ވަނީ މިދިޔަ އީދު ބަންދުގައި، އިންޑިއާގެ ބޮޑުވަޒީރު ނަރެންދްރާ މޯދީގެ ފޮޓޯ ޖަހާފައިވާ މާސްކު އަޅައިގެން "އިންޑިއާ އައުޓް" ހަރަކާތް ހިންގާފައެވެ.

އެހެން ނަމަވެސް، ދެ ޕާޓީން މިއަދު ވެސް ބައްދަލުވުމެއް ވަނީ ބާއްވާފައެވެ.

ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޑިމޮކްރެޓްސްގެ މުއައްސިސް އަދި ހެންވޭރު ހުޅަނގު ދާއިރާގެ މެންބަރު ހަސަން ލަތީފް މިއަދު ވިދާޅުވީ، ޕްރޮގްރެސިވް ކޮންގްރެސް ކޯލިޝަނާ އެކު މަސައްކަތްކުރަން ޖެހުނަސް، ޑިމޮކްރެޓްސް އިން ހިފަހައްޓަމުން އަންނަ އުސޫލުތައް ދޫނުކުރާނެ ކަމަށެވެ. އެގޮތުން، ރާއްޖެ އާއި ދޭދޭ ގައުމުތަކުގެ މެދުގައި އޮންނަ ގުޅުމަށް ބުރޫ އަރާފަދަ ކަމެއް ކުރުމަށް އެ ޕާޓީން އެއްބަސްނުވާނެ ކަމަށް އޭނާ ވިދާޅުވިއެވެ.

ހަސަން ވިދާޅުވި ގޮތުގައި، "އިންޑިއާ އައުޓް" ހަރަކާތް ފަދަ ދޭދޭ ގައުމުތަކާއި ރާއްޖެ އާ ދެމެދު އޮންނަ ގުޅުންތަކަށް ބުރޫ އަރާ ފަދަ ހަރަކާތްތައް ހިންގާ ޕާޓީތަކާ އެކު މަސައްކަތްކުރަން ޑިމޮކްރެޓްސް އަށް ދަތިވާނެއެވެ. އޭނާ ވިދާޅުވީ، ޕްރޮގްރެސިވް ކޮންގްރެސް ކޯލިޝަނާ އެކަމުގައި ވާހަކަ ދައްކައިގެން ހައްލެއް ހޯދޭނެ ކަމަށް ގަބޫލުކުރައްވާ ކަމަށެވެ.

ހަމަ އެއާއެކު، ދެ ފަރާތުން ގުޅިގެން ހިންގާ ހަރަކާތެއްގައި "އިންޑިއާ އައުޓް" ހިންގިޔަ ނުދޭނެ ކަމުގެ ޔަގީންކަން ހަސަން ދެއްވިއެވެ.

ޑިމޮކްރެޓްސްގެ މެންބަރުން އެމްޑީޕީގައި އޭރު ތިބިއިރު ވެސް ވަނީ، އިންޑިއާ އައުޓް ހަރަކާތުގެ މައްސަލައިގައި ޕްރޮގްރެސިވް ކޮންގްރެސް ކޯލިޝަނަށް ވަރަށް ބޮޑަށް ފާޑުކިޔައި، ދޭދޭ ގައުމުތަކުގެ މެދުގައި އޮންނަ ގުޅުންތަކަށް ބުރޫ ނާރާނެހެން އަމަލުކުރުމަށް ތަކުރާރުކޮށް އެދިފައެވެ.

ހަބަރު ދަ ޑިމޮކްރެޓްސް ޕީއެންސީ ޕީޕީއެމް