މާލޭގެ ގެއެއްގެ ތެރޭގައި މަރުވެފައި އޮތް ފިރިހެނަކު ފެނިއްޖެއެވެ.
ފުލުހުން ބުނީ މިއަދު 13:20 ހާއިރު ހެންވޭރު ގެއެއްގައި މީހަކު މަރުވެފައި އޮތް ކަމުގެ ރިޕޯޓު ލިބިފައިވާ ކަމަށާއި ހޮސްޕިޓަލަށް ގެންދިޔަ އިރުވެސް އޭނާ މަރުވެފައި ކަމަށް ހޮސްޕިޓަލާ ހަވާލާދީ ބުންޏެވެ.
އަދި އެއީ 43 އަހަރުގެ ފިރިހެނެއްކަމަށާއި މި މައްސަލައާ ގުޅިގެން ބަލަންޖެހޭ ކަންކަން އިތުރަށް ބަލަމުންދާނެ ކަމަށްވެސް ފުލުހުންވަނީ ބުނެފައެވެ.
ހެންވޭރު ލޮނު ޒިޔާރަތް މަގުގައި ހުރި ގެއެއްގެ ތެރެއިން މީހަކު މަރުވެފައި އޮއްވާ ފެނުމުން އެ ސަރަހައްދުގައި ފުލުހުން ހަރަކާތްތެރި ވަމުންދާއިރު އެ މީހާ ފެނުނު ގެ ވަނީ ވަދެ ނުނިކުމެވޭ ގޮތަށް ބަންދު ކޮށްފައެވެ.
މީގެ ކުރިންވެސް ގޭގެއިން މީހުން މަރުވެފައި ތިއްބާ ފެންނައިރު ދާދި ފަހުން ނ.މަނަދޫގައި ހިންގި ގަތުލުގައި ނައީމާވެސް މަރާލާފައި އޮތީ އޭނާ ދިރިއުޅޭ ގޭގެ ކޮޓަރި ތެރޭގައެވެ. އެކަމުގެ ތުހުމަތު ކުރެވޭ މީހުން ހައްޔަރު ކޮށްފައިވާއިރު ތަހުގީގު އަދިވެސް ކުރިއަށް ގެންދެއެވެ.
