މެންބަރުންގެ ހަޅޭކާ އެކު، ދެވަނަ ފަހަރަށް ވެސް ޖަލްސާ މެދުކަނޑާލުމަށް ފަހު، އޭގެ ފަހުން ވެސް ކުރިއަށް ނުގެންދެވި، އެންމެ ފަހުން މިއަދުގެ ޖަލްސާ ވެސް ނިންމާލައިފިއެވެ.
މިއީ މި ހަފްތާގައި ބޭއްވި ރައްޔިތުންގެ މަޖިލީހުގެ ޖަލްސާއެވެ. ކޮމިޓީތައް އެކުލަވާލުމާ ގުޅޭ ގޮތުން މެންބަރުންގެ މެދުގައި އެއްބަސްވުމަކަށް ނާދެވި، ދެވަނަ ފަހަރަށް ވެސް ޖަލްސާ މެދުކަނޑާލުމަށް ފަހު، އޭގެ ފަހުން ވެސް ޖަލްސާ ކުރިއަށް ނުގެންދެވި، އެންމެ ފަހުން ނިންމާލީއެވެ.
މިއަދުގެ ޖަލްސާގެ އެޖެންޑާގެ ތެރެއިން އެއްވެސް މަސައްކަތެއް ކުރިއަށް ނުދިޔަ ތާނގައި، ފާހަގަވެގެން ދިޔައީ އެއް މެންބަރަކު އަނެއް މެންބަރަކާ ދިމާލަށް ހަޑިހުތުރު ބަހުން އެއްޗެހި ގޮވައި، މެންބަރުންގެ ވާހަކަ އަށް ހުރަސް އަޅައި، ތިން ގަޑިއިރު ބޭކާރު ގޮތުގައި ނަގާލި މަންޒަރެވެ.
ޖަލްސާ ކުރިއަށް ނުގެންދެވިގެން އެންމެ ފުރަތަމަ މެދުކަނޑާލީ ހެނދުނު 9:30 ހާއިރު، ޕާޓީތަކުގެ މަޖިލިސް ގްރޫޕްތަކުގެ ލީޑަރުންނާއި ރިޔާސަތާ ދެމެދު ޖަލްސާ ކުރިއަށް ގެންދާނެ ގޮތަކާ މެދު މަޝްވަރާކުރުމަށެވެ. އޭގެ ފަހުން ޖަލްސާ އަލުން ފަށާފައި ވަނީ ސައި ގަޑީގެ ފަހުން، 11:30 ގެ ވެސް ފަހުންނެވެ.
ރައްޔިތުންގެ މަޖިލީހުގެ ޖަލްސާގައި ރިޔާސަތު ބެލެހެއްޓެވި ވިލުފުށި ދާއިރާގެ މެންބަރު ހަަސަން އަފީފް ވަނީ ސައި ގަޑިއަށް ފަހު މަޖިލިސް ފަށްޓަވައި، ކުއްލި މައްސަލަ ހުށަހެޅުމަށް މަޑުއްވަރީ ދާއިރާގެ މެންބަރު އާދަމް ޝަރީފް އުމަރަށް އަނެއްކާ ވެސް ފުރުސަތު އަރުއްވައިފައެވެ. މިއަދުގެ ފުރަތަމަ ދަންފަޅިއެކޭ އެއްގޮތަށް، މެންބަރުން އަޑުގަދަކުރައްވަމުން ގެންދަވާތީ ޝަރީފަށް ކުއްލި މައްސަލަ ހުށަހެޅުއްވޭ ގޮތެއް ނުވިއެވެ.
ކުރިން ވެސް ނެންގެވި ނިޒާމީ ނުކުތާ އަލުން ނަންގަވައި މެދުހެންވޭރު ދާއިރާގެ މެންބަރު އަލީ އާޒިމް ވަނީ، ރައްޔިތުންގެ މަޖިލީހުގެ ގަވައިދުގެ 54 ވަނަ މާއްދާ އަށް ރިއާޔަތްކުރައްވައިފައެވެ. އެ މާއްދާގެ (ށ) ގައި ވާ ގޮތުން، ޖަލްސާގެ އެޖެންޑާ ގައި ހިމަނާނީ އެ ޖަލްސާއެއްގައި ނިންމުމަށް، ނުވަތަ ކުރުމަށް އެދި ހުށަހަޅާ ކަންކަމެވެ. އެ ކަންކަން އޮންނަން ވާނީ ސާފުކޮށް އެނގޭ ވަރަށް، އަދި ނިންމަން އެދޭ ތަރުތީބުން ކަމަށް ވެސް ވެއެވެ.
އާޒިމްގެ އިތުރުން، "ޑިމޮކްރެޓްސް" އަށް ނިސްބަތްވެވަޑައިގަންނަވާ މެންބަރުން ވިދާޅުވަމުން ގެންދެވީ، ކޮމިޓީތައް އެކުލަވާލުމަށް އެޖެންޑާ ކޮށްފައިވާ މައްސަލަ ސާފުނޫން ކަމަށެވެ. އެހެންވެ، އެ މެންބަރުން ގޮވާލައްވަމުން ގެންދެވީ އެ ނަންބަރު އެޖެންޑާ އިން ނަންގަވައި، ޖަލްސާ ކުރިއަށް ގެންދިއުމަށެވެ.
"އަނެއްކަމަކީ މަޖިލީހުގަ އެބަ ތިއްބެވި، އެއްވެސް ޕާޓީއަކަށް ނިސްބަތްނުވާ 16 މެންބަރުން، އެ މެންބަރުންނަށް އެކަމާ ބެހޭ އެއްވެސް މައުލޫމާތެއް ނުލިބި މިއަދު އެޖެންޑާ އަށް ނުއެއް ލެވޭނެ، ރިޕޯޓެއް ތައްޔާރުކޮށްފަ ރިޕޯޓެއް މިއަދު ޕޯޓަލް އަށް ލާފަ އެޖެންޑާގަ ހިމަނައިގެން މިކަމެއް ނުކުރެވޭނެ، އަޅުގަނޑުމެން ވެސް އަޅުގަނޑުމެންގެ ހައްގު، ކޮމިޓީތަކުގަ ބޭނުންވާ ހައްގު މިންވަރަށް މަސައްކަތްކުރުމުގެ ހައްގު އޮންނަން ޖެހޭނެ،" ޑިމޮކްރަޓްސް އަށް ނިސްބަތްވާ، ނަމަވެސް އަދި ރަޖިސްޓްރީ ނުވާތީ އަމިއްލަ މެންބަރެއްގެ ގޮތުގައި ހުންނެވި ހުޅުދޫ ދާއިރާގެ މެންބަރު އިލްޔާސް ލަބީބް ވިދާޅުވިއެވެ.
އަފީފް ވިދާޅުވީ، ޖަލްސާ ކުރިއަށް ދާނީ މަޝްވަރާ ކުރައްވައި، މެންބަރުންގެ މެދުގައި ހުރި ހިޔާލު ތަފާތުވުންތަކަށް ހައްލެއް ލިބިގެން ކަމަށެވެ. އެ ނެންގެވި މައްސަލައިގައި އަފީފް ވިދާޅުވީ، އިދާރީ މޭޒުގައި މަޝްވަރާ ކުރައްވާނެ ކަމަށެވެ.
އެ ވަގުތު ވެސް މަޖިލީހުގެ މެންބަރުން ގެންދިޔައީ އަޑުގަދަކުރައްވަމުންނެވެ.
މަރަދޫ ދާއިރާގެ މެންބަރު އިބްރާހީމް ޝަރީފް ނިޒާމީ ނުކުތާ ނަންގަވައި ވިދާޅުވި ގޮތުގައި، މަޖިލިސް ކުރިއަށް ގެންދިއުމަށްޓަކައި ކޮމިޓީތައް އެކުލަވާލުމުގެ މައްސަލަ މިއަދު ވެސް ނިންމުން މުހިންމެވެ. އޭނާ ރިޔާސަތަށް ގޮވާލެއްވީ، މެންބަރުންގެ ނަން އިއްވައި، މަޖިލީހުގައި ހަމަޖެހުން ގާއިމްކޮށް، ޖަލްސާ ކުރިއަށް ގެންދިއުމަށެވެ. ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް ނިޒާމީ މައްސަލައެއް ނަންގަވައި ތުހުމަތުކުރެއްވި ގޮތުގައި، ޝަރީފް ވަނީ ހުސައިންގެ މޫނުމަތީގައި މަޖިލީހުގެ ގަވައިދު ފޮތުން ޖެއްސެވި ކަމަށް ތުހުމަތުކުރައްވައިފައެވެ.
ވަކި ހިސާބަކުން ޑިމޮކްރެޓްސްގެ ބައެއް މެންބަރުން ގޮނޑިތަކުން ތެދުވެ، ރިޔާސަތުގެ މޭޒު ކުރިމައްޗަށް ވަޑައިގެން، ކޮމިޓީތަކުގެ މައްސަލަ އެޖެންޑާ ނުކުރެވޭނެ ކަމަށާއި، ޖަލްސާ ކުރިއަށް ދަނީ ގަވައިދާ ހިލާފަށް ކަމަށް ވިދާޅުވާ މަންޒަރު ފެނެއެވެ. އެ މެންބަރުންގެ އިތުރުން، އިދިކޮޅު މެންބަރުން އެއް އަޑަކުން ގެންދެވީ ރައީސް އިބްރާހީމް މުހައްމަދު ސޯލިހަށް "އިބޫ ޗޯރު"ގެ ނަމުން މުހާތަބުކުރައްވަމުންނެވެ.
އޭރު ވެސް އަފީފް ގެންދެވީ، މެންބަރުން ގޮނޑިތަކަށް ވަޑައިގަތުމަށް ދަންނަވަމުންނެވެ.
އިބްރާހީމް ޝަރީފްގެ އިތުރުން، އެމްޑީޕީ އަށް ނިސްބަތްވެވަޑައިގަންނަވާ ބައެއް މެންބަރުން ނިޒާމީ ނުކުތާ ނަންގަވައި ގޮވާލެއްވީ، މަޖިލީހުގެ ޖަލްސާ ކުރިއަށް ގެންދެވޭނެ ގޮތެއް ހަމަޖައްސައި، ޖަލްސާ ކުރިއަށް ގެންދިއުމަށެވެ. އަދި މަޖިލީހުގެ ނިޒާމް ގެއްލި، މެންބަރުން އަޑުގަދަކުރައްވަމުން ގެންދަވާއިރު ވެސް، މެންބަރުންގެ ނަންތައް ނުއިއްވައި، އަފީފް މާ ބޮޑަށް އަޅާނުލައްވާތީ ބައެއް މެންބަރުން އޭނާ އަށް ފާޑުވިދާޅުވެފައިވެއެވެ.
"މަޖިލިސް ކުރިއަށް ގެންދެވޭނީ އިއްޒަތްތެރި މެންބަރުންގެ އެއްބާރުލުން ލިބިގެން،" އަފީފް ވިދާޅުވިއެވެ.
މީގެ ކުރިން ވެސް ނިޒާމީ މައްސަލައެއް ނެންގެވި އާމިރު ވަނީ އަނެއްކާ ވެސް ނިޒާމީ މައްސަލައެއް ނަންގަވައި، މަޝްވަރާކުރައްވައި، މަޖިލިސް ކުރިއަށް ގެންދެވޭނެ ގޮތެއް ހެއްދެވުމަށް ދަންނަވައިފައެވެ. އޭނާ ވަނީ މައްސަލަ ހައްލުކުރުމަށްޓަކައި މީގެ ކުރިން މިއަދު ވެސް މަޝްވަރާކުރެއްވި ކަން ފާހަގަކުރައްވައިފައެވެ.
އާމިރުގެ ނިޒާމީ މައްސަލަ ބައްލަވައިގަތުމަށް ފަހު، އަފީފް ވަނީ އަނެއްކާ ވެސް ޖަލްސާ މެދުކަނޑާލައްވައިފައެވެ. އޭނާ އެދިވަޑައިގަތީ ސިޔާސީ ޕާޓީތަކުގެ މަޖިލިސް ގްރޫޕްތަކުގެ ލީޑަރުން ރިޔާސަތުގެ މޭޒު ކައިރިއަށް ވަޑައިގެން، ޖަލްސާ ކުރިއަށް ގެންދާނެ ގޮތަކާ މެދު މަޝްވަރާ ކުރެއްވުމަށެވެ.
ޖަލްސާ މެދުކަނޑާލިތާ 20 މިނެޓަށް ފަހު އަލުން ޖަލްސާ ފެށި ނަމަވެސް، މެންބަރުންގެ އަޑު މަޑުވާ ގޮތެއް ނުވިއެވެ. ޑިމޮކްރެޓްސްގެ މެންބަރުން ޖަލްސާ "ނުގެންދެވޭނެ" އޭ ވިދާޅުވާ އަޑު އެބަ އިވެއެވެ. ޑިމޮކްރެޓްސް އާއި ޕީޕީއެމްގެ މެންބަރުން "ޗޯރޭ" އާއި "ޗޯރު އިބުރޭ" ގޮވަމުންދާ އަޑު އިވެއެވެ. އެވަގުތު ވެސް އަފީފް ގެންދެވީ މެންބަރުން މަޖިލީހުގެ ގަވައިދަށް ހުރުމަތްތެރިކޮށް ހިއްތެވުމަށާއި ގޮނޑިތަކަށް ވަޑައިގަތުމަށް ގޮވާލައްވަމުންނެވެ.
"އާދެ، ނިންމާލަނީ، ނިންމާލަނީ..." ނިޒާމު ގެއްލި، ޖަލްސާ ނިންމަވާލެއްވުމުގެ ކުރިން ކުޑަ ސިކުންތުކޮޅަކަށް ދެމިގެން ދިޔަ ފޯނު ކޯލެއް މެދުކަނޑާލައްވަމުން އަފީފް ވިދާޅުވިއެވެ. އެއަށް ފަހު، އަފީފް ވަނީ ޖަލްސާ ނިންމަވާލެއްވިކަން އިއުލާނުކުރައްވައިފައެވެ. އޭރު ވެސް މެންބަރުން އަޑުގަދަކުރައްވަމުން ގެންދެވިކަން ފާހަގަކުރެވެއެވެ.
