މި ފަހަރު ސަރުކާރުން ހުޅުވައިލި ސްޓޫޑެންޓް ލޯނަށް ކުރިމަތިލި ދަރިވަރުންގެ ތެރެއިން 1225 ދަރިވަރަކު ލޯނަށް ޝަރުޠު ހަމަވާ ކަމަށާއި އެ ހުރިހާ ދަރިވަރުންނަށް ލޯނު ދޭން ނިންމަވާފައިވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް ސޯލިހު މިފަދައިން ވިދާޅުވީ 2021-2020 ވަނަ އަހަރުގެ މަތީ ސާނަވީ ތައުލީމު ނިންމާ އިމްތިހާނުތަކުން އެންމެ ރަނގަޅު ނަތީޖާ ހާސިލްކުރި ދަރިވަރުންނަށް "މަތީ އަރުތަވެރިންގެ އިނާމް" ދިނުމަށް ރޭ ދަރުބާރުގޭގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ރާއްޖެއާ ރާއްޖެއިން ބޭރުން މަތީ ތަޢުލީމާއި ތަމްރީން ޙާޞިލުކުރުމަށް ސަރުކާރުން ދޫކުރާ ލޯނު ދިނުމުގައިވެސް މިއަހަރު ސަރުކާރުން ހެޔޮބަދަލުތަކެއް ގެނެސްފައިވާ ކަމަށާއި ސްޓޫޑެންޓް ލޯނަށް ގެނެވުނު އެ ބަދަލާއި ގުޅޭ އިތުރު ތަފްސީލްތައް ހަޔާ އެޑިއުކޭޝަން މިނިސްޓްރީއިން ހާމަކުރައްވާނެ ކަމަށެވެ.
މަތީ ތަޢުލީމަށް ސަރުކާރުން ފޯރުކޮށްދޭ ފަހި ފުރުސަތުތަކުގެ އިތުރުން ހުނަރާއި ފަންނުވެރި މަސައްކަތްތެރި ޒުވާނުން ބިނާކުރުމަށް ސަރުކާރުންކޮށްފައިވާ މަސައްކަތްތަކުގެ މައްޗަށް އަލިއަޅުވާލައްވާ ރައީސް ވިދާޅުވީ ނޭޝަނަލް އެޕްރެންޓިސްޝިޕް ޕްރޮގްރާމުގެ ފުރުސަތު ޖުމްލަ 665 ޒުވާނަކަށް މިހާތަނަށް ފަހިކޮށްދެވިފައިވާ ކަމަށެވެ.
ރޭގައި ރަން ވަނަތައް ހޯއްދެވި ދަރިވަރުންނަށް އިޝާރާތްކުރައްވާ ރައީސް ސޯލިހު ވަނީ މަތީ ސާނަވީ ތައުލީމު ނިންމާ އިމްތިހާނުތަކުން އެންމެ ރަނގަޅު ނަތީޖާ ހޯދައި މި ކާމިޔާބަށް ވާސިލްވުމަށް ކޯވިޑް 19ގެ ހާލަތާއި އެކުގައިވެސް ދަރިވަރުންކޮށްފައިވާ ބުރަ މަސައްކަތްތައް ފާހަގަކޮށް ދަރިވަރުންނަށާއި އެ ދަރިވަރުންގެ ބެލެނިވެރިން އަދި ޓީޗަރުންނާއި މުދައްރިސުނަށް ޝުކުރު އަދާކުރެއްވިއެވެ. އަދި އެ ދަރިވަރުންގެ އެ ކާމިޔާބީއަކީ ގައުމުގެ ކުރިމަގާއި މެދު އުއްމީދު އާވެގެންދާކަމެއް ކަމަށެވެ.
