ގެއްލިގެން ހޯދަމުން ދިޔަ ހއ. އިހަވަންދޫ ނަސްރީނުގެ، އާއިޝަތު އިހްސާނާ (32އ) އާއިލާއަށް ގުޅާފައިވާ ކަމަށް އާއިލާއާ ހަވާލާދީ ފުލުހުން ބުނެފިއެވެ.
އާއިޝަތު އިހްސާނާ އޭނާގެ އާއިލާއަށް މިއަދު ގުޅާފައިވާ ކަމަށް އާއިލާއާ ހަވާލާދީ ފުލުހުން ބުނެއެވެ. އަދި އޭނާއާއި ދަރިފުޅުގެ ހާލުވެސް ރަނގަޅުކަމަށް ބުނެފައިވާކަމަށް ވެސް އާއިލާއިން ފުލުހުންނަށް ވަނީ މައުލޫމާތު ދީފައެވެ.
2 އަހަރުގެ ދަރިފުޅާ އެކު އިހްސާނާ ގެއްލިގެން ފުލުހުންނަށް ރިޕޯޓް ކުރުމާއި ގުޅިގެން އޭނާ ހޯދުމަށް ފުލުހުން އިއުލާނު ކޮށްފައި ވަނީ މިއަދުއެވެ. އޭނާ ހަބަރެއްނުވެ އާއިލާއަށް ގެއްލިފައިވާ ކަމަށް ރިޕޯޓުކޮށްފައި ވަނީ މިމަހު 29 ވަނަ ދުވަހު ކަމަށް ފުލުހުން ބުނެއެވެ.
ގެއްލުނުކަން އިއުލާނުކޮށް ފުލުހުން ބުނެފައި ވަނީ އޭނާ އެންމެ ފަހުން ފެނިފައި ވަނީ 29 ވަނަ ދުވަހު ހެނދުނު، އޭނާ ދިރިއުޅޭ ހުޅުމާލެ، ހިޔާ 06-4-15 އިން ކަމަށް އޭނާގެ އާއިލާއިން ފުލުހުންނަށް މައުލޫމާތު ދީފައިވާ ކަމަށެވެ. އަދި އިހުސާނާ ގެއްލިފައި ވަނީ އޭނާގެ، ދެ އަހަރުގެ އަންހެން ދަރިފުޅާއެކުގައި ކަމަށް އާއިލާއިން ފުލުހުންނަށް މައުލޫމާތު ދީފައިވާ ކަމަށެވެ.
ފަހަކަށް އައިސް މާލެ ސަރަހައްދުން ވާނުވާއެއް ނޭނގި މީހުން ގެއްލޭ މައްސަލަތައް އަންނަނީ ފެންމަތި ވަމުންނެވެ.
