ރޭގެ ވަގުތެއްގައި ހުޅުމާލޭގައި ފުލުހަކަށް ހަމަލާދީ މާރާމާރީ ހިންގި މައްސަަލައިައި ހައްޔަރު ކުރި މީހުންގެ ބަންދު ޖަހައިފިއެވެ.
ފުލުހުން ބުނީ، ރޭ ފުލުހެއްގެ ގައިގައި ތަޅައި މާރާމާރީ ހިންގި މައްސަލައާ ގުޅިގެން ހައްޔަރު ކުރި މީހުންގެ ތެރޭގައި ހިމެނެނީ 21 އަހަރާއި، 33 އަހަރާއި، 42 އަހަރާއި، 44 އަހަރުގެ ފިރިހެނެއް ކަމަށެވެ. އެމީހުންގެ ބަންދާ މެދު ގޮތެއް ނިންމުމަށް ހުޅުމާލެ މެޖިސްޓްރޭޓް ކޯޓަށް ގެންދިއުމުން ވަނީ އެމީހުންނަށް ބަންދުގެ މުއްދަތު ޖަހާފައި ކަމަށް ފުލުހުން ބުނެއެވެ.
- 21 އަހަރުގެ މީހާ: ބަންދަށް 15 ދުވަސް
- 33 އަަހަރުގެ މީހާ: ބަންދަށް 5 ދުވަސް
- 42 އަހަރުގެ މީހާ: ބަންދަށް 7 ދުވަސް
- 44 އަހަރުގެ މީހާ: ބަންދަށް 7 ދުވަސް
ރޭ ހިނގި މި މާރާމާރީގައި އަނިޔާވި ފުލުސް މީހާއަށް ހުޅުމާލެ ހޮސްޕިޓަލުގައި ފަރުވާ ދިނުމަށް ފަހު ހޮސްޕިޓަލުން ދޫކޮށްލާފައިވާ ކަމަށް ފުލުހުން ބުނެފައި ވެއެވެ. ނަމަވެސް ފުލުހުންގެ އޮފިސަރަށް ލިބުނު އަނިޔާތަކުގެ ތަފްސީލެއް ހާމައެއް ނުކުރެއެވެ.
އެ ފުލުސް މީހާއަށް ހަމަލާ ދީފައިވާ ވީޑިއޯ ބެއްލެވިކަން ފާހަގަ ކުރައްވާ ސީޕީ މުހައްމަދު ވަނީ ހިތްވަރާއެކު އެ ހަމަލާ ހުއްޓުވަން މަސައްކަތް ކުރި ގަލޮޅު ޕޮލިސް ސްޓޭޝަންގެ ސާޖަންޓްއަށް ތައުރީފު ކުރައްވާފައެވެ. އަދި ރޭގެ 7:30 ހާއިރު ހުޅުމާލޭގައި ފުލުހަކަށް ހަމަލާދީ މާރާމާރީ ހިންގީ ގޭންގަކުން ކަަމަށް ވެސް ސީޕީ ވިދާޅުވެފައި ވެއެވެ.
'ދަ ޕްރެސް' އަށް މައުލޫމާތު ލިބިފައިވާ ގޮތުގައި ފުލުހުންގެ އޮފިސަރަކަށް ހުޅުމާލެއިން ބަޔަކު ހަމަލާދީފައި ވަނީ އޭނާ ކުލަ ހެދުމުގައި ހުއްޓައެވެ. އަދި ބައެއް މަސްދަރުތަކުން ބުނާ ގޮތުގައި ހަމަލާ ދިން މީހުން ފިލަން ގޮސް ވަނީ ހުޅުމާލޭގެ 53 ނަންބަރު ފްލެޓަށެވެ.
