ރާއްޖޭގެ ޒުވާން ހުނަރުވެރިން އެއްތައް ކުރުވާ "ފަންނުގެ ދަރިން" ޖަމިއްޔާއާއި އާބަންކޯ ގުޅިގެން ހުޅުމާލެ އަދި ކުޑަގިރީގައި ހުނަރުވެރިންގެ ފަންނު ދައްކައިލުމަށް ބާއްވާ ސެޝަންތަކުގެ ތެރެއިން 27 ވަނަ ސެޝަން އިއްޔެ ބާއްވައިފިއެވެ.
އިއްޔެ އެ ސެޝަން ކުރިއަށް ގެންގޮސްފައި ވަނީ ހަވީރު 4 އިން ރޭގަނޑު 10 އާ ހަމައަށް ހުޅުމާލޭގެ ދިރާގު ބީޗު ސަރަހައްދުގައެވެ.
އާބަންކޯއިން ބުނީ އެ ކުންފުނިން ފަންނުގެ ދަރިން ޖަމިއްޔާއާ ގުޅިގެން ބާއްވަމުން ދާ އެ ސެޝަންތަކަކީ ރާއްޖޭގައި ތިބި ހުނަރުވެރިންގެ ފަންނުވެރިކަމާއި ސަގާފަތް ދައްކުވައިދޭ ގޮތަށް ކޮންމެ މަހަކު ބާއްވާ ސެޝަންތަކެއް ކަމަށާއި އެގޮތުން އެ ސެޝަންތައް ކުރިއަށް ގެންދަނީ އެކި ފަންނުވެރިންގެ ހުނަރުވެރިކަން ފެނިގެން ދާނެ ސްޓޯލްތަކާއި ދިވެހި މިއުޒިކް ބޭންޑުތަކުގެ ލައިވް މިއުޒިކާ އެކުގައި ކަމަށެވެ.
2019 ވަނަ އަހަރުވެސް ފަންނުގެ ދަރިން ޖަމިއްޔާގެ ފަރާތުން އެ ސެޝަންތައް ކުރިއަށް ގެންގޮސްފައި ވާއިރު އެ ސެޝަންތައް މެދުކަނޑަލާފައި ވަނީ ކޮވިޑް 19 ގެ ސަބަބުން ކަމަށް ވާއިރު ދެ އަހަރުގެ މެދުކެނޑުމަކަށް ފަހު އަނެއްކާ ވެސް އެ ސެޝަންތައް ފަށައި އާބަންކޯއާއެކު އެއްބަސްވުމަކަށް އައިސްފައި ވަނީ މި އަހަރުގެ ފެބްރުއަރީ މަހުގައެވެ.
އެ ކުންފުންޏާ ގުޅިގެން ބޭއްވި ފުރަތަމަ ސެޝަން ބާއްވާފައި ވަނީ މިދިޔަ ފެބްރުއަރީ މަހު ސެންޓްރަލް ޕާކުގައެވެ.
އާބަންކޯއަކީ އަބަދުވެސް އަމިއްލަ އުފެއްދުންތަކާއި ހުނަވެރި ފަންނުވެރިންގެ މަސައްކަތަށް އެއްބާރުލުންދީ އެ ހުނަރުތައް އާންމުންނާ ހަމައަށް ގެނެސްދިނުމަށް އެއްބާރުލުންދެމުން އަންނަ ކުންފުންޏަކަށް ވާއިރު ފަންނުގެ ދަރިން ސެޝަންއަކީ ވެސް އެ މަގުސަދުގައި ކުރިއަށް ގެންދާ ހަރަކާތެކެވެ.
