ހަންބޯ ކޮމްޕެނީ ޕްރައިވެޓް ލިމިޓެޑްގެ ފަރާތުން ހުޅުމާލޭގައި ތަރައްގީ ކުރަމުން އަންނަ "ކޭޕާކް ރެސިޑެންސް" ގެ އެޕާޓްމަންޓުތައް އޮޅުވާލައިގެން ވިއްކި މައްސަލައިގައި އެ ކުންފުނީގެ ދިވެހި ހިއްސާދާރު ކަމަށްވާ ހަސަން މަމްދޫހް (މަންޑޭ) ގެ އެޕާޓްމަންޓްތަކަށް ފުލުހުން ވަދެ ފާސްކުރަން ފަށައިފިއެވެ.
"ދަ ޕްރެސް" އަށް އެނގިފައިވާ ގޮތުން ހުޅުމާލޭގައި ހުންނަ އަމީން އެވެނިއުގައި މަންޑޭ ކުއްޔަށް އުޅޭ އެޕާޓްމަންޓަކަށް ފުލުހުން ވަދެ މިހާރު ދަނީ ފާސްކުރަމުންނެވެ. މަމްދޫހްގެ މައްޗަށް ކުރާ ތުހުމަތުތައް ބަލައިދިނުމަށް އެދި އާބަންކޯ އިން ފުލުހުންނަށް ހުށަހަޅައި ތަހުގީގު ކުރިއަށް ދާ އިރު، ހަމްބޯގެ ޗައިނާގެ ހިއްސާދާރުވެސް ވަނީ މަމްދޫހުގެ މައްސަލަ ފުލުހަށް ހުށަހަޅާފައެވެ. އެއާއެކު މަމްދޫހްގެ އިތުރުން އޭނާގެ ބައެއް ބައިވެރިންގެ ޕާސްޕޯޓް ވަނީ ހިފަހައްޓާފައެވެ.
އަދި މައްސަލައިގެ ތުހުމަތު ކުރެވޭ އާބަންކޯގެ މުވައްޒަފު އަބްދުލް ނާފިއު މުހަންމަދު ވަނީ 14 ދުވަހުގެ މުއްދަތަކަށް ސަސްޕެންޑް ކޮށްފައެވެ. އަދި އެ ކޯޕަރޭޝަންގެ އިންޓާނަލް އޮޑިޓާއި ފުލުހުންނާ ގުޅިގެން އެ މައްސަލަ ތަހުގީގު ނިމުމުން އެ މުވައްޒަފަށް އިތުރަށް ފިޔަވަޅެއް އަޅަން ޖެހިއްޖެ ނަމަ އެ ފިޔަވަޅު އަޅާނެ ކަމަށް އާބަންކޯ ބުނެއެވެ.
ހަންބޯ ކޮމްޕެނީގެ މައި ހިއްސާދާރު އަދި މެނޭޖިން ޑިރެކްޓަރު ޖިން ޝިހޫގެ 95 ޕަސެންޓު ހިއްސާ އޮންނަ އެ ކުންފުނީގެ މައިނޯރިޓީ ހިއްސާދާރު ކަމަށްވާ ހަސަން މަމްދޫހު (މަންޑޭ) އޮންނަނީ 5 ޕަސެންޓް ހިއްސާއެވެ. ނުއަގުގައި އެތައް ބަޔަކަށް އެޕާޓްމަންޓްތައް ވިއްކާފައި ވާއިރު އެޕާޓްމަންޓުތައް ގަނެ ވިއްކުމުގެ އެއްބަސްވުންތަކުގައި މަމްދޫހު ސޮއިކޮށްފައި ވަނީ ޖިން ޝިހޫގެ ސޮއި ފޯޖުކޮށްގެން އޭނާގެ ވިޔަފާރީގެ އެހެން ޕާޓުނަރެއް ކަމަށް ވާ ޖައިޝަން ސައީދު ކިޔާ މީހަކަށް ދީފައިވާ ކަމަށް ބުނާ އެ ކުންފުނީގެ ގަރާރެއް ބޭނުން ކޮށްގެންނެވެ.
މި މައްސަލައިގައި މަމްދޫހުގެ އަމިއްލަ ބޭނުމަށް ކަސްޓަމަރުންގެ އަތުން ދަރަންޏަށް ފައިސާ ނަގާފައިވާ ކަމަށް އާބަންކޯއިން ބުނާ އިރު، މި ކަމާ ގުޅިގެން މަމްދޫހު ނެރުނު ބަޔާނުން އޭނާ ވަނީ އެ ތުހުމަތުތައް ދޮގުކޮށް އެއީ އޭނާގެ ބޮލުގައި އަޅުވާ އިލްޒާމެއްގެ ގޮތުގައި ސިފަ ކޮށްފައެވެ. ޖިން ޝީ ހޫ ޝެއާ ސްޓްރަކްޗާ ބަދަލު ކުރަން ހުށަހެޅި ކަމަށާއި ދެ ޑައިރެކްޓަރުން ތިބި ބޯޑަކަށް 3 ޑައިރެކްޓަރުން އައްޔަންކޮށް ކޯރަމް 2 ޑައިރެކްޓަރުންގެ މައްޗަށް ބަދަލު ކުރުމަށް ހުށަހެޅީ ނުބައި ރޭވުމެއްގައި ކަމަށް މަމްދޫހް ބުނެފައި ވެއެވެ. ޖިން ޝީ ހޫ އުޅުނީ ހަންބޯ މޯލްޑިވްސްގެ އޮފީހުގައި ތިބި އޭނާގެ އެކައުންޓަންޓުންނާ ގުޅިގެން އެޕާޓުމަންޓުތައް ވިއްކުމަށް ފަހު ފައިސާ ނަގައިގެން ރާއްޖެއިން ފިލަން ކަމަށް މަމްދޫހު ބުނެފައި ވެއެވެ.
ކޭޕާކް ފްލެޓްތަކުގެ މަޝްރޫއު ހިންގަން އާބަންކޯ އިން ހަންބޯ ކުންފުންޏާ އެކު އެއްބަސްވުމެއް ހަދާފައި ވަނީ އޮކްޓޯބަރު 9، 2016 ގައެވެ. އަދި މަސައްކަތްތައް ފަށާފައި ވަނީ 2017 ގައެވެ. ނަމަވެސް އެކި ސަބަބުތަކާ ހުރެ ރާއްޖޭގެ އޭޖެންޓާ އެކު މަސައްކަތް ކުރެވެން ނެތުމުން އެ އެއްބަސްވުން އުވާލަފައިވާ ކަމަށް މި މަހު ކުރީކޮޅު ހަންބޯ ކުންފުނިން ބުނެފައި ވެއެވެ.
