އައްޑޫގެ ދެކުނުން އޮންނަ ޗާގޮސްގެ ކަނޑުގެ ސަރަހައްދުގެ މައްސަލައިގައި އިލްމުވެރިންގެ ގުޅުމުން، ރައީސް އިބްރާހީމް މުހައްމަދު ސޯލިހް އާ ބައްދަލުކޮށް މަޝްވަރާ ކޮށްފިއެވެ.
އިއްޔެ ކުރިއަށް ދިޔަ މި ބައްދަލވުވުމުގައި އިލްމުވެރިންގެ ގުޅުމުގެ ފަރާތުން ވަނީ މި މައްސަލައިގައި އެ ގުޅުމުން ހޯދާފައިވާ ހޯދުންތަކާ، އެ މައްސަލާގައި ހުރި ކަންބޮޑުވުންތައް ރައީސް އާ ހިއްސާ ކޮށްފައެވެ. މީގެ އިތުރުން އިލްމުވެރިންގެ ގުޅުމުން ވަނީ މި މައްސަލައާ ގުޅިގެން ރައީސް އަށް ތިންކަމެއް ހުށަހަޅާފައެވެ.
މިގޮތުން ރައީސް އަށް ހުށަހަޅާފައިވާ ކަންތައްތަކުގެ ތެރޭގައި ރާއްޖޭ އީއީޒެޑް ކަމަށް ގާނޫނުގައި ބަޔާން ކޮށްފައި ވާ ސަރަޙައްދާ މެދު، އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އިން ނިންމާފައިވާ ނިންމުން މުރާޖައާ ކުރުމަށާއި، ޗާގޮސްގެ މައްސަލާގައި މޮރިޝަސްގެ ސަރުކާރަށް ރާއްޖެ އިން ފޮނުވި ސިޓީ ރައްޔިތުންގެ މަޖިލީހުގެ 241 ކޮމިޓީއާ ހިއްސާ ކުރުމަށް ހިމެނެއެވެ.
މީގެ އިތުރުން އީއީޒެޑް މައްސަލާގައި ސަރުކާރުގެ ސްޓޭންޑާ ދެކޮޅު ފަރާތްތަކާ އެކު ސަރުކާރުން އާންމު ބަހުސަކަށް ދިއުމަށް ވަނީ އެދިފައެވެ.
ރާއްޖޭގެ ކަނޑުގެ ސަރަަހައްދާއި ޗާގޯސްގެ ކަނޑުގެ ސަރަހައްދާ ފުށުއަރާ ކަމަށް ބުނެ އެ މައްސަލަ އައިސީޖޭ އާއި އިޓްލޮސް އަށް މޮރިޝަސް އިން ގެންދި ޔައީ 2019 ވަނަ އަހަރުއެވެ. އަދި މިއަހަރު އޭޕްރީލް 29 ގައި އިޓްލޮސްއިން މި މައްސަލައިގައި ނިންމާފައި ވަނީ، ފުށުއަރާ 200 ނޯޓިކަލް މޭލުގެ ސަރަހައްދު ރާއްޖެއާއި މޮރިޝަސް އާ ދެމެދު އެއްވަރަކަށް ބެހުމަށެވެ.
