ރާއްޖެ އާއި މޮރިޝަސް އާ ދެމެދު އިން ކަނޑައެޅި މައްސަލައިގައި ރައީސް އިބްރާހީމް މުހައްމަދު ސޯލިހުގެ އަޒުލްކުރުމަށް ރައްޔިތުންގެ މަޖިލިހަށް ވެއްދުމަށް ބޭނުންވާ އަދަދަށް ސޮއި ލިބޭނެ ކަމަށް އިދިކޮޅުން ބުނެފިއެވެ.
އިމުގެ މައްސަލައިގައި މިދިޔަ މަހުގެ 28 ވަނަ ދުވަހު އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އިން ހުކުމްކުރީ އިކުއިޑިސްޓެންޓުގެ ދަށުން 200 ނޯޓިކަލް މޭލުގެ ސަރަހައްދެއް ބަހާލުމަށެވެ. އެގޮތަށް ބަހާލުމުން ރާއްޖެ އަށް ލިބުނީ 47،232 އަކަ ކިލޯމީޓަރުގެ ސަރަހައްދެކެވެ. މޮރިޝަސް އަށް ލިބުނީ 45،331 އަކަ ކިލޯމީޓަރުގެ ސަރަހައްދެކެވެ.
އެގޮތަށް އިމުގެ މައްސަލަ ނިމިގެން ދިއުމަކީ ކާމިޔާބެއްގެ ގޮތުގައި ސަރުކާރުން ސިފަކުރި ނަމަވެސް، އެ މައްސަލައިގައި ސިޔާސީ ޕާޓީތަކާއި ސަރުކާރުގައި މަސައްކަތްކުރެއްވި ބޭފުޅުންގެ އިތުރުން، އާންމުން ސަރުކާރަށް ފާޑުކިޔާފައިވެއެވެ. އެ މައްސަލައިގައި ރައީސްގެ އިތުރުން ފޮރިން މިނިސްޓަރު އަބްދުﷲ ޝާހިދާއި ބަންޑާރަނައިބު އިބްރާހީމް ރިފްއަތުގެ މައްޗަށް އިތުބާރު ނެތް ކަމުގެ މައްސަލައެއް ހުށަހެޅުމަށް ނިންމާފައިވާ ކަމަށް، އިދިކޮޅުން މި މަހުގެ ކުރީކޮޅު ބުންޏެވެ.
އެ މައްސަލައިގައި އެކުގައި މަސައްކަތްކުރަނީ:
- ޕްރޮގްރެސިވް ކޮންގްރެސް ކޯލިޝަން (ޕީޕީއެމް / ޕީއެންސީ)
- ޖުމްހޫރީ ޕާޓީ
- އެމްޑީޕީގެ "ފިކުރެއްގެ ދިރުން" ފެކްޝަން
- އެމްއެންޕީ
މަޖިލީހުގެ އިދާރާގައި މި ޖޮއިންޓް ޕާޅިމަންޓް ގްރޫޕުން ބޭއްވި ނޫސްވެރިންގެ ބައްދަލުވުމުގައި ރައީސް އަޒުލްކުރުމުގެ މައްސަލަ ހުށަނޭޅި ލަސްވީ ކީއްވެތޯ ނޫސްވެރިޔަކު ސުވާލުކުރުމުން، ޕީއެންސީގެ ޕީޖީ ގްރޫޕްގެ ލީޑަރު އަދި މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވަނީ، އެ މައްސަލަ ހުށަހެޅޭ އަދަދަށް ސޮއި ހަމަވާނެ ކަމުގެ ޔަގީންކަން ދެއްވައިފައެވެ.
ނޫސްވެރިންގެ ބައްދަލުވުމަށް ފަހު، އާދަމް ޝަރީފް ވިދާޅުވީ ރައީސަށް އިތުބާރު ނެތް ކަމުގެ މައްސަލަ ވެއްދުމަށްޓަކައި މިހާރު ވެސް 29 މެންބަރުން ސޮއިކުރަން އެއްބަސްވެފައިވާ ކަމަށެވެ. އޭނާ ވިދާޅުވި ގޮތުގައި، ސޮއިކުރުމުގެ ކަންކަން ލަސްވަނީ ބައެއް މެންބަރުން ރާއްޖޭން ބޭރުގައި މިވަގުތު ތިބުމުންނެވެ.
ގާނޫނުއަސާސީގެ 100 އާއި 101 ވަނަ މާއްދާގައިވާ ގޮތުން، ސަބަބު ބަޔާންކޮށް، ރައީސްގެ އިތުބާރު ނެތްކަމުގެ މައްސަލަ ހުށަހެޅޭނީ މަޖިލީހުގެ ތިންބައިކުޅަ ދެބައި މެންބަރުންގެ ސޮޔާ އެކުގައެވެ. އަދި ވަޒީރެއްގެ އިތުބާރު ނެތް ކަމުގެ މައްސަލައެއް ހުށަހެޅޭނީ މަދުވެގެން 10 މެންބަރުންގެ ސޮޔާ އެކުގައެވެ.
ވަޒީރެއްގެ އިތުބާރު ނެތް ކަމަށް ފާސްވުމަށް މަޖިލީހުގެ ދެބައިކުޅަ އެއްބައި މެންބަރުންގެ ވޯޓު ބޭނުންވާނެއެވެ. އެއީ 43 ވޯޓެވެ. ރައީސްގެ އިތުބާރު ނެތް ކަމަށް ފާސްވާނީ މަޖިލީހުގެ މެންބަރުންގެ ތިންބައިކުޅަ ދެބައި މެންބަރުންގެ ވޯޓުންނެވެ.
ބަންޑާރަނައިބު ރިފްއަތުގެ މައްސަލަ މަޖިލިހަށް ހުށަހަޅާފައިވާއިރު، އަންނަ ހަފްތާގައި ފޮރިން މިނިސްޓަރު ޝާހިދުގެ މައްސަލަ އަންނަ ހަފްތާގެ ތެރޭގައި ހުށަހަޅުއްވާނެ ކަމަށް، ވިލިމާލެ ދާއިރާގެ މެންބަރު އަހްމަދު އުޝާމް ވަނީ މިއަދު ވިދާޅުވެފައެވެ.
