އަލް މަޝްއަރު ހައްޖު އެންޑް އުމްރާ ގްރޫޕުން އުމްރާ އަށް ގެންދިޔަ މީހުންގެ ފްލައިޓް ޗާޓަރު ކުރި ކުންފުންޏަށް ދޭން ޖެހޭ ފައިސާ ނުދައްކާތީ އެ މީހުން ރާއްޖެ ގެނެސްދެވެން ނެތްކަމަށް އެކުންފުނިން ބުނެފިއެވެ.
މަޝްއަރު ގުރޫޕްގެ ފަރާތުން މިއަހަރު ރޯދަމަހު 146 މީހުން އުމްރާއަށް ގެންދިޔައެވެ. އެމީހުން ރާއްޖެ އައުމަށް ތާވަލު ކުރީ މި މަހުގެ 27 ގައެވެ.
"ޓްރެވެލް 2 މޯލްޑިވްސް" ކިޔާ ކުންފުންޏެއް މެދުވެރިކޮށް ފްލައިޓް ޗާޓަރު ކުރުމާއި ޓިކެޓް ނެގުމުގެ ހަރަދަށް 141،450 ޑޮލަރު އަރާފައިވާއިރު ފައިސާ ފަހުން ދައްކާނެ ކަމަށް ބުނެ އަލް މަޝްއަރު އުމްރާ ގުރޫޕުުން ދޫކުރި ދެ ޗެކު ބައުންސްވި މައްސަލަ އެ ކުންފުނިން ވަނީ އިސްލާމިކް މިނިސްޓްރީ އަށް ހުށަހަޅާފައެވެ.
އެ ކުންފުނި މެދުވެރިވެގެން މިރޭ ފަތިހު ހަތަރު ގުރޫޕެއްގެ މީހުން ރާއްޖެ އަންނަން ސައޫދީން ފުރަން ތާވަލު ކޮށްފައިވާއިރު އޭގެ ތެރޭގައި މަޝްއަރު ގުރޫޕުގެ 8 މީހަކު ހިމެނެއެވެ. ބާކީ 138 މީހުން ރާއްޖެ ގެންނަން ތާވަލު ކޮށްފައި ވަނީ އަންނަ ބުރާސްފަތި ދުވަހުއެވެ.
ނަމަވެސް އެ ގުރޫޕުން އަދިވެސް ފައިސާ ދައްކާފައި ނުވާތީ، މަޝްއަރު ގުރޫޕްގެ އުމްރާވެރިން ހަވާލުގައި ނުގެންނަން މިހާރު ނިންމާފައިވާ އެކުންފުނިން ވަނީ ބުނެފައެވެ.
އިސްލާމިކް މިނިސްޓްރީން ވަނީ އެ ގުރޫޕުގެ މި މައްސަލަތަކާ ގުޅިގެން އަލް މަޝްއަރު ގުރޫޕްގެ ހަވާލުގައި ގެންދިޔަ 200 އަށް ވުރެ ގިނަ އުމްރާވެރިން ރާއްޖެ ގެނައުމުގައި ދަތިތަކެއް ކުރިމަތިވެދާނެތީ ކަންބޮޑުވުން ފާޅުކޮށްފައެވެ.
