ފުލުހެއްގެ ގައިގައި ޖެހި މައްސަލައެއްގައި ތިން މީހަކު ރޭ ހައްޔަރުކޮށް، ހަފްތާއަކަށް އެ ތިން މީހުން ބަންދުކޮށްފިއެވެ.
މީޑިއާ އަށް ދިން މައުލޫމާތުގައި ފުލުހުން ބުނީ، މަޖީދީމަގުގައި ހުންނަ ޓިނު ޕާކު ކައިރީ ހިނގި އެކްސިޑެންޓަކާ ގުޅިގެން މާރާމާރީއެއް ހިނގާ ކަމަށް ރިޕޯޓެއް ރޭ ލިބިފައިިވާ ކަމަށެވެ.
އެ މާރާމާރީ ހުއްޓުވަން ދިޔަ ފުލުހުންނަށް އިންޒާރުދީ، އެ ތަނުން ފުލުހަކަށް ހަމަލަދިން ކަމަށާއި، އެ މާރާމާރީ އާ ގުޅިގެން ތިން ފިރިހެނަކު ހައްޔަރުކުރި ކަމަށް ފުލުހުން ބުންޏެވެ. އޭގެ ތެރޭގައި ހިމެނެނީ 20 އަހަރުގެ ފިރިހެނަކާއި، 21 އަހަރުގެ ފިރިހެނެއްގެ އިތުރުން، 25 އަހަރުގެ ފިރިހެނެކެވެ.
ފުލުހެއްގެ ގައިގައި ޖެހުމުގެ އިތުރުން، މުދަލަށް ގެއްލުން ދިން ކަމަށް އެ ތިން މީހުންގެ މައްޗަށް ފުލުހުން ތުހުމަތުކުރެއެވެ. އެ ތުހުމަތުތަކަށް ބާރު ލިބޭ ކޮންމެވެސް މިންވަރަކަށް ހެކި ކޯޓަށް ހުށަހަޅާފައިވާ ކަމަށް، އެ މީހުން ބަންދުކުރުމަށް ކުރި އަމުރުގައި ވެއެވެ.
އެ މީހުންގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، އެ ތިން މީހުންނަށް ޖަހާފައި ވަނީ ހަތް ދުވަހުގެ ބަންދުގެ މުއްދަތެކެވެ.
ފުލުހުން ދަނީ އެ މައްސަލަ ބަލައި އިތުރަށް ތަހްގީގުކުރަމުންނެވެ.
