ފުވައްމުލަށް ސިޓީގައި 400 މީހުންގެ ޖާގައިގެ މިސްކިތެއް އަޅަން ބަޔަކާ ހަވާލުކޮށްފިއެވެ.
ފުވައްމުލައް ސިޓީގައި ދޮންބޭޒް ޕްރައިވެޓް ލިމިޓެޑާއި ހަވާލުކޮށްގެން އަޅާ "މަސްޖިދުލް ފަލާހް" އަކީ 365 ދުވަހު ތެރޭގައި އަޅާ ނިންމަން ޖެހޭ މިސްކިތެއް ކަމަށް އިސްލާމިކް މިނިސްޓްރީން ބުނެއެވެ.
މި މަސައްކަތުގެ އެއްބަސްވުމުގައި މިނިސްޓްރީގެ ފަރާތުން ސޮއި ކުރެއްވީ އިސްލާމިކް މިނިސްޓާ ޑރ. އަޙްމަދު ޒާހިރު އަލީ އެވެ. ދޮންބޭޒް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އެކުންފުނީގެ މެނޭޖިން ޑިރެކްޓަރު އަދި ފުވައްމުލަކު އުތުރު ދާއިރާގެ މެންބަރު މުހައްމަދު ރަޝީދެވެ.
މި މަސައްކަތް އެ ކުންފުންޏާ ހަވާލުކުރި އަގެއް މިނިސްޓްރީން ހާމަކޮށްފައެއް ނުވެއެވެ.
ރާއްޖޭގެ އެކި ސަރަހައްދުތަކުގައި މިސްކިތް ބިނާކުރުމަށް ކުރަމުން އަންނަ މަސައްކަތުގެ ދަށުން މި ދައުރުގައި 40 މިސްކިތެއް ބިނާކުރުމުގެ މަސައްކަތް ވަނީ ފަށާފައެވެ. މީގެ ތެރެއިން މިވަގުތު 17 އަށް ވުރެ މިސްކިތެއް ހުޅުވާ އަންނަނީ ބޭނުން ކުރަމުންނެވެ.
