ލ. ފޮނަދޫގައި ކަރު ބުރިކޮށްލައިގެން އަނިޔާވެރި ގޮތަކަށް މަރާލި، ބަންގްލާދޭޝް ރައްޔިތެއް ކަމަށްވާ މުހައްމަދު އަސަން އުއްލާގެ މަރުގެ މައްސަލައިގައި ދައުވާ ލިބުނު މީހުން ސަލާމަތްވި މައްސަލަ ދައުލަތުން ހައި ކޯޓުގައި އިސްތިއުނާފް ކޮށްފިއެވެ.
މުހައްމަދު އަސަން އުއްލާ މަރާލައިފައި އޮއްވާ ފެނުނީ އޭނާ ގެއްލިގެން އުޅޭތާ ދެ ދުވަސް ފަހުން މާޗް 30، 2017 ވަނަ ދުވަހު ފޮނަދޫ ގޮނޑުދޮށުންނެވެ. ފުލުހުން ކުރި ތަހުގީގުން އޭނާ މަރާލައިފާ ވަނީ އޭގެ ފަސް ދުވަސް ކުރިން އެ މަހުގެ 26 ވަނަ ދުވަހު އެނގުނު ކަމަށްވެސް ބުނެފައި ވެއެވެ.
އެ މައްސަލައިގައި ގަސްތުގައި މީހަކު މަރާލުމުގެ ދައުވާ އުފުލާފައިވާނީ ބަނގްލަދޭޝްގެ އަބޫކަލަމްގެ މައްޗަށެވެ. ދެން ދައުވާ އުފުލި ބަންގްލަދޭޝްގެ ހަތް މީހުންނަށް ކުރަނީ ގަސްތުގައި މީހަކު މަރާލުމުގައި ބައިވެރިވުމުގެ ދައުވާއެވެ. އެ އެންމެންނަކީވެސް ބަންގްލަދޭޝްއަށް ނިސްބަތްވާ މީހުންނެވެ.
އެމީހުންގެ މައްޗަށް ކުށް ސާބިތުކުރުމަށް އެކަށީގެންވާ ވަރަށް ހެކި ލިބިފައިނުވާ ކަމަށް ބުނެ އެ މީހުންގެ މައްޗަށް ކުށް ސާބިތުނުވާ ކަމަށް ކަނޑައެޅިއެވެ.
ދައުވާ ލިބުނު އަށް މީހުންގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން ކުރި ހުކުމުގެ ތެރެއިން ދައުލަތުން އިސްތިއުނާފް ކުރީ ހަ މީހެއްގެ މައްސަލައެވެ. އެ މައްސަލަތައް ބަލައިގަތުމާ މެދު ހައި ކޯޓުން އަދި ވަކި ގޮތެއް ނުނިންމައެވެ.
ކުރިމިނަލް ކޯޓުން އޭރު ކުރި ހުކުމުގައިވާ ގޮތުގައި ތަހުގީގު މަރުހަލާގައި ދެ މީހަކު ކުށަށް އިއުތިރާފުވި ނަމަވެސް އެ މީހުން ހާދިސާ ހިނގި ގޮތް ކިޔައިދީފައިވަނީ ތަފާތު ދެ ގޮތަކަށް ކަމަށާއި ތަހުގީގަށް ދީފައިވާ ބަޔާންތަކުގައި ފުށުއެރުންތަކެއް ހުރި ކަމަށެވެ.
މީގެ އިތުރުން އެ ހާދިސާ ހިނގިތަން ފެނުނީ އެންމެ މީހަކަށް ކަމަށާއި އެމީހާއަކީ ނުކުޅަދޭ މީހަކަށްވެފައި ދޮގު ވާހަކަ ފަތުރާ މީހެއްކަމަށް އެހެން ހެކިވެރިން ބުނެފައިވާ ކަމަށް ކްރިމިނަލް ކޯޓުގެ ހުކުމުގައި ފާހަގަ ކޮށްފައިވެއެވެ.
