ފުލުހުން ހިންގި ޑްރަގް އޮޕަރޭޝަނެއްގައި ހުޅުމާލޭ އެޕާޓްމެންޓަކުން ހައްޔަރު ކުރި ފުލުހުންގެ ޑްރަގް އެންފޯސްމަންޓް ޑިޕާޓްމަންޓް (ޑީއީޑީ)ގެ އޮފިސަރު ވަޒީފާއިން ވަކިކުރަން ފުލުހުންގެ ބޯޑުން ނިންމައިފިއެވެ.
ނިމިދިޔަ އަހަރުގެ ނޮވެމްބަރު، 10 ވަނަ ދުވަހުގެ ރޭ ހުޅުމާލޭގެ އެޕާޓްމަންޓަކުން ހައްޔަރުކޮށްފައި ވަނީ ފުލުހުންގެ ބެލުމުގެ ދަށަށް ގެންދާ ޑްރަގްސްގެ ސްޓޮކް ބެލެހެއްޓުމުގެ މަސައްކަތްކުރި ހަސަން ޝުޖާއުއެވެ. ޝުޖާއު އާ އެކު އޭނާގެ ލޯބިވެރިޔާ މަރިޔަމް ސަފާ، 31 ގެ އިތުރުން ޖުމްލަ 21 މީހަކު ވަނީ ފުލުހުން ހިންގި އެ އޮޕަރޭޝަންގައި ހައްޔަރު ކޮށްފައެވެ. އޭގެ ތެރޭގައި ހިމެނެނީ 8 ފިރިހެނަކާއި 4 އަންހެނުންނެވެ.
ފުލުހުން ބުނެފައިވަނީ އެ މީހުން ތިބި އެޕާޓްމަންޓުން ވަނީ ޑްރަގް ޓްރެފިކިންގެ މިންގަނޑަށް ފެތޭ މިންވަރަށް ޑްރަގްސް ފެނިފައި ކަމަށެވެ. އެ މައްސަލައިގައި ޝުޖާއު ސަސްޕެންޑް ކުރިނަމަވެސް މިހާރު ވަނީ ސަސްޕެންޝަނުގެ މުއްދަތު ހަމަވެފައެވެ. ވަޒީފާއިން ވަކިކުރަން ފުލުހުންގެ ބޯޑުން ނިންމި ނަމަވެސް އިސްތިއުނާފު ކުރެވޭ މައްސަލައެއް ކަމުން އެ މުއްދަތުގައި ވަޒީފާއިން ވަކި ނުކުރެވޭނެއެވެ. މި ކަން އިތުރަށް ސާފު ކުރުމަށް ފުލުހުންގެ ރަސްމީ ބަހެއް ވަނީ ލިބޭ ގޮތް ނުވެފައެވެ.
ޝުޖާއު އަކީ ޑްރަގް އެންފޯސްމަންޓުގެ ބެލުމުގެ ދަށަށް ގެންދާ މަސްތުވާތެކެތި ބަލަހައްޓާ ޓީމުގައި ހިމެނޭ ފުލުހެއް ނަމަވެސް ޑީއީޑީގެ ބެލުމުގެ ދަށަށް ގެންގޮސްފައިވާ މަސްތުވާތެކެތި ބެލެހެއްޓުމުގައި އަމަލުކުރާ އުސޫލު ހަމަޖެހިފައިވާ އޮންނަ ގޮތުން އެތަކެތި ނަހަމަ ގޮތުގައި ބޭނުން ކުރުމުގެ އެއްވެސް ފުރުސަތެއް އެފުލުހަށް ނުވަތަ އެހެން އެއްވެސް ފުލުހަކަށް ނޯންނާނެ ކަމުގެ ޔަގީންކަން ފުލުހުން މީގެ ކުރިން ދީފައިވެއެވެ.
