މިދިޔަ ހުކުރު ދުވަހުގެ ރޭ މާލޭގެ ފިހާރައެއްގެ ތެރޭގައި މީހަކަށް ހަމަލާދީ ޒަހަމްކޮށްލި މައްސަލައިގައި ހައްޔަރުކުރި މީހާގެ ބަންދަށް 15 ދުވަސް ޖަހައިފިއެވެ.
ފުލުހުން ބުނީ އެ މައްސަލައިގައި ހައްޔަރު ކުރި 20 އަހަރުގެ ފިރިހެން މީހާގެ ބަންދަށް ކްރިމިނަލް ކޯޓުން 15 ދުވަސް ދީފައިވާ ކަމަށެވެ. އޭނާ ހައްޔަރުކޮށްފައި ވަނީ ފުލުހުންގެ ތަހުގީގަށް ހޯދުނު ހޯދުމުގެ މައްޗަށް، ކޯޓު އަމުރެެއްގެ ދަށުން ރޭ ދަންވަރުގެ ވަގުތެއްގައެވެ.
މާފަންނުގައި ހުންނަ 'ކްރާސާ' ފިހާރަ ތެރޭގައި ވަޅިން ހަމަލާދީ ޒަހަމްކޮށްފައި ވަނީ އައްޑޫ ސިޓީ ހިތަދޫ އަށް އުފަން އުމުރުން 30 އަހަރުގެ ދިވެހި ފިރިހެނަކަށެވެ.
ސޯޝަލް މީޑިއާގައި ދައުރުވަމުން އަންނަ ވީޑިއޯތަކުން ފެންނަގޮތުން އޭނާ ގައިގެ އެތަން މިތަނަށް ވަޅި ހަރާފައިވާއިރު މިހާރު އޭނާއަށް ފަރުވާދެމުން ދަނީ އައިޖީއެމްއެޗްގައެވެ.
އޭނާއަށް ލިބުނު އަނިޔާގެ އިތުރު ތަފްސީލެއް އައިޖީއެމްއެޗް އިން ހާމަކޮށްފައި ނުވާއިރު ފުލުހުން އަންނަނީ މި މައްސަލަ ތަހުގީގު ކުރަމުންނެވެ.
