ސައިކަލު ދުއްވާ ފަރާތްތަކުގެ ތެރެއިން ހެލްމެޓު އެޅުން ލާޒިމް ނޫން ސަރަހައްދުތަކުގައި ހެލްމެޓު އަޅައިގެން ދުއްވާ މީހުން ފާސްކުރުމަށް ފުލުހުން ނިންމައިފިއެވެ.
މިދިޔަ ބުރާސްފަތި ދުވަހުގެ ހަވީރުގެ ވަގުތެއްގައި، ހެލްމެޓް އަޅައިގެން ސައިކަލެއްގައި އައި ދެ މީހަކު ވަނީ ހުޅުމާލޭގެ ޓޭކްއަވޭ ކެފޭ އެއް ކަމަށްވާ "ޖޫސް ޓައިމް" އަށް ވަދެ، ތަނަށް ބޮޑެތި ގެއްލުން ދީފައެވެ.
މިއަދު ނެރުނު ނޫސްބަޔާނެއްގައި ފުލުހުން ބުނީ، ހެލްމެޓު އެޅުން ލާޒިމް ނޫން ސަރަހައްދުތަކުގައި ކާކުކަން ނޭނގޭ ގޮތަށް، ކުށްކުރުމުގެ ނިޔަތުގައި ހެލްމެޓު އަޅައިގެން ބައެއް މީހުން އުޅޭކަން ފާހަގަކުރެވިފައިވާ ކަމަށެވެ.
އެހެންކަމުން އެ ސަރަހައްދުތަކުގައި ހެލްމެޓު އަޅައިގެން އެއްގަމު އުޅަނދު ދުއްވާ މީހުންނަށް ފާރަވެރިވެ، ޝައްކު އުފެދޭ މީހުން ބަލައި ފާސްކުރަމުން ގެންދާނެ ކަމަށާއި، މިގޮތަށް ފިޔަވަޅު އަޅަން ނިންމީ އާންމުންގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން ކަމަށް ފުލުހުން ބުންޏެވެ.
ގާނޫނުގައިވާ ގޮތުން، ސައިކަލު ދުއްވާ މީހާ އާއި ފަހަތުގައި އިންނަ މީހާ ހެލްމެޓް އެޅުން ލާޒިމް ވަނީ 30 ކިލޯމީޓަރަށް ވުރެ ބާރަށް އެއްގަމު އުޅަނދު ދުއްވަން ހުއްދަކޮށްފައިވާ މަގުތަކުގައެވެ. ފުލުހުން ބުނި ގޮތުގައި، އެ މަގުތަކުގައި އުޅަނދު ދުއްވޭ ބާރުމިން އަންގައިދޭ ބޯޑު ހަރުކޮށްފައި ހުންނާނެއެވެ.
ފުލުހުންގެ ކޮމިޝަނަރު މުހައްމަދު ހަމީދު އިއްޔެ ވިދާޅުވީ، ހުޅުމާލޭގައި ހުންނަ ޖޫސް ޓައިމް ކެފޭ ފުނޑާލީ މާލޭގައި ހަރަކާތްތެރިވާ ދެ ގޭންގެއްގެ ދެމެދުގައި އުފެދިފައިވާ މައްސަލައަކާ ގުޅިގެން ކަމަށެވެ. އޭނާ ވިދާޅުވި ގޮތުގައި، އެ މާރާމާރީ ހިންގި މީހުން ހަރަކާތްތެރިވީ ހެލްމެޓު އަޅައި ސައިކަލުގެ ނަންބަރު ޕްލޭޓްތައް ބަދަލުކޮށްގެންނެވެ.
މި މައްސަލަ ތަހްގީގުކުރަމުންދާ ކަމަށް ފުލުހުން މީގެ ކުރިން ބުނެފައިވެއެވެ.
