މޫނު ނިވާކޮށްގެން ތިބި ދެ މީހަކު ހުޅުމާލެ ކެފޭއަކަށް ވަދެ ގެއްލުންދީފިއެވެ.
ހުޅުމާލޭގައި ހުންނަ "ޖޫސް ޓައިމް" ކިޔާ ޓޭކްއަވޭ ތަނަކަށް ރޭ އިރުއޮއްސޭ ހާއިރު ގެއްލުންދީފައި ވާއިރު ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި އެ މީހުން ތިބީ ކަޅު ކުލައިގެ ޓީޝާޓު ލައިގެން މޫނު ނިވާކޮށްގެން ހެލްމެޓުވެސް އަޅައިގެންނެވެ. އެ މީހުންގެ އަތުގައި މަރުތެލެއް އޮތް އިރު އެ މީހުން އަންނަތަން ފެނި އެތަނުގެ ކައުންޓަރުގައި ހުރި މީހާ ވަނީ ބިރުން ދުއްވައިގެންފައެވެ.
އެ މީހުން ފުރަތަމަ އެތަނަށް ވަދެފައިވަނީ ކައުންޓަރު މަތީގައި ހުރި އެއްޗެހިތައް އުކާލުމަށްފަހު ކައުންޓަރު މަތީގައި މަރުތެޔޮލުން ތަޅާ ކައުންޓަރާ ދިމާލުގައި ހުރި ކުޑަ ދޮރުންނެވެ. އެތަނަށް ވަނުމަށް ފަހު އެތަނުގެ ތެރޭގައި ހުރި ތަކެތީގައި މަރުތެޔޮލުން ތަޅާ ގެއްލުންދޭ މަންޒަރުވެސް ވީޑިއޯއިން ފެނެއެވެ.
އެއަށްފަހު އެތަނުން އެކަކު އެތަނުގެ ވަތްގަނޑުގެ ތެރޭގައި ހުރި ފައިސާ ނަގައިގެންދާ އިރު ދެން ހުރި މީހާ ނިކުމެގެން ދިޔައީ އެތަނުގެ މައި ދޮރުގެ ބިއްލޫރި ދޮރު ތަޅާލުމަށް ފަހުއެވެ. އަދި އެ ދެމީހުން އެތަނަށް ދިޔަ ސައިކަލަށް އަރައިގެން ދާ ތަންވެސް އެ ވީޑިއޯތަކުން ފެނެއެވެ.
އެކަމާ ގުޅިގެން ފުލުހުން ބުނީ ހުޅުމާލޭ ޖޫސް ޓައިމްއަށް ބަޔަކު ވަދެ ގެއްލުންދީފައިވާ މައްސަލައެއް ރޭގެ ވަގުތެއްގައި ފުލުހުންނަށް ރިޕޯޓް ކޮށްފައިވާ ކަމަށެވެ. އަދި އެ މައްސަލަ ތަހުގީގުކޮށް މީހުން ދެނެގަތުމުގެ މަސައްކަތް ކުރަމުން އަންނަ ކަމަށް ފުލުހުން ބުނެއެވެ.
