ކައިވެނި ހަފްލާތަކަށް ހާއްސަކޮށް، ޝައިޚް އަލީ ޒައިދުގެ "ކައިވެނި" މަދަހަ އަލްބަމް ރިލީޒްކޮށްފިއެވެ.
އެކަމަށްޓަކައި މެންހަޓަން ބިޒްނަސް ހޮޓެލްގައި ރޭ ބޭއްވި ހަފްލާއެއްގައި އެ އަލްބަމް ރަސްމީކޮށް ރިލީޒްކޮށްދެއްވީ އިސްލާމިކް މިނިސްޓަރު ޑރ. އަހްމަދު ޒާހިރު އަލީއެވެ.
ތާރަ އާއި ވޯކަލް ބޭނުންކޮށްގެން ހަދާފައިވާ، ދީނީ ނަސޭހަތާއި ކައިވެނީގެ އިރުޝާދުތައް އެކުލެވޭ 16 މަދަހަ އެއް ހިމެނޭ މި އަލްބަމުގެ ރެކޯޑިން ކުރިއަށް ގެންގޮސްފައި ވަނީ އަލް-ކައުން ސްޓޫޑިއޯ އާއި ޓޮނިކް ލައިވް ސްޓޫޑިއޯއިންނެވެ.
މި އަލްބަމްގެ ލަވަތައް ޔޫޓިއުބް މެދުވެރިކޮށް މިހާރު އަޑުއަހާލެވޭނެއެވެ.
ޝައިޚް ޒައިދު ވިދާޅުވީ މި އަލްބަމް ހަދާފައި ވަނީ ކައިވެނީގެ ހަފްލާތަކުގައި ޖަހައި، ކައިވެނިކުރާ ދެމަފިރިންނަށް ކައިވެނީގެ އުފާވެރިކަން އިހުސާސްކުރުމަށް ކަމަށެވެ.
ޝައިޚް ޒައިދުގެ އިތުރުން، މި އަލްބަމްގެ މަދަހަތަކަށް އަޑުއަޅައިދީފައިވާ މަޝްހޫރު ތަރިންގެ ތެރޭގައި މޯލްޑިވިއަން އައިޑަލުން މަޝްހޫރުވި ޝަލަބީ އިބްރާހީމާއި، ޝައިޚް އިބްރާހީމް ފަރީދުގެ ދަރިފުޅު އަބްދުﷲ ފަރީދުގެ އިތުރުން، މުހައްމަދު އަބްދުލްޣަނީ (ތޭރަވާ)، އަދި އިބްރާހީމް ޒައިދު އަލީ (ކުޑައިއްބެ) ހިމެނެއެވެ.
