ރާއްޖެއިން ފަގީރުކަން ނައްތާލުމުގެ އަމާޒުގައި ކުރިއަށްގެންދާ "ޒަކާތު ނަފާ"ގެ ފުރަތަމަ ޕްރޮގްރާމުގެ ދަށުން ހދ.ނޮޅިވަރަމުގެ 5 އާއިލާއަކަށް އެހީވާން ނިންމާފައިވާ ކަމަށް އިސްލާމިކް މިނިސްޓްރީން ބުނެފިއެވެ.
އިސްލާމިކް މިނިސްޓަރު ޑރ.އަހްމަދު ޒާހިރު އަލީ ވިދަޅުވީ، މި ޕްރޮގްރާމްގެ ދަށުން 4 އާއިލާއަކަށް ދަނޑުވެރިކަން ކުރުމުގައި އެހީތެރިކަން ފޯރުކޮށްދޭނެ ކަމަށާއި އަދި 1 އާއިލާއަށް ފެހުމުގެ ވިޔަފާރިއާއެކު ކުރިއަށްދިއުމަށް އެހީތެރިކަން ފޯރުކޮށްދިނުމަށް ނިންމާފައިވާ ކަމަށެވެ.
ވަރަށް އަވަހަށް މި ޕްރޮގްރާމް ފަށްޓަވާނެ ކަމަށާއި މި ޕްރޮގްރާމް ފައްޓަވައިދެއްވާނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކަމަށް ވެސް މިނިސްޓަރު ފާހަގަކުރެއްވިއެވެ.
ޒަކާތު ނަފާ ޕްރޮގްރާމަކީ އިސްލާމިކް މިނިސްޓްރީ އާއި އިކޮނޮމިކް މިނިސްޓްރީ ގުޅިގެން މިދިޔަ އަހަރުގެ ފެބްރުއަރީ 28 ގައި، ފަގީރުންނާއި މިސްކީނުންގެ ދަފްތަރުގައިވާ ފަރާތްތަކަށް މާލީ އެހީތެރިކަން ދިނުމަށް ފެށި ޕްރޮގްރާމެކެވެ.
އެ ޕްރޮގްރާމް ހިންގަނީ ކަނޑައެޅޭ ވަކި މިންގަޑުތަކަކާއި އުސޫލުތަކުގެ ދަށުން ވަކި އަދަދެއްގެ ބަޔަކަށް ފުދުންތެރިކަން އިތުރުކޮށް، ބޭނުންވާ ތަކެތި ހޯދައިދީ، ތަމްރީނު ޕްރޮގްރާމްތައް ހިންގުމަށެވެ.
ޒަކާތު ނަފާ ޕްރޮގްރާމް ހިންގާނެ އުސޫލުގައި ބުނާގޮތުން ޒަކާތު ނަފާ ޕްރޮގްރާމްގެ ތެރެއިން ޒަކާތު ފަންޑުން ހަރަދުކުރެވޭނީ އާއިލާއަކަށް ގިނަވެގެން 150،000ރ އެވެ. އޭގެ އިތުރުން އެސްއެމްއީ ފަންޑު މެދުވެރިކޮށް އަނބުރާ ދައްކާ ގޮތަށް، އިންޓްރަސްޓް ނުހިމެނޭ ލޯނެއްގެ ގޮތުގައި ވަކި މިންވަރެއް އެހީގެ ގޮތުގައި ހަމަޖެއްސިދާނެ ކަމަށް ވެސް އުސޫލުގައިވެއެވެ.
އެ ޕްރޮގްރާމްގެ ދަށުން އެހީދެވޭ ދާއިރާތަކުގެ ތެރޭގައި ހިމެނެނީ ގެދޮރުގެ ނަފާ އާއި، ޕޯލްޓްރީ ފާމިން އާއި، ހައިޑްރޯފޯނިކް ދަނޑުވެރިކަމާއި، ފަރުމަސްވެރިކަމާއި، ފެހުމާއި، އެޕްރެންޓިސްޝިޕް ޕްރޮގްރާމްތަކެވެ.
