މާލެ ސަރަހައްދުން މި އަހަރުގެ ފަގީރުންނާއި މިސްކީނުންގެ ދަފުތަރުގައި ރަޖިސްޓްރީވާން ހުޅުވާލުމުން ރަޖިސްޓްރިވިކަން ނާންގާ ފަރާތްތަކަށް ޝަކުވާ ހުށަހެޅުމުގެ ފުރުސަތު އިސްލާމިކް މިނިސްޓްރީން ހުޅުވާލައިފި އެވެ.
މިނިސްޓްރީން ބުނީ، މާލެ އާއި ވިލިމާލޭގެ އިތުރުން ހުޅުމާލޭން ފަގީރުންނާއި މިސްކީނުންގެ ދަފުތަރުގައި ރަޖިސްޓްރީވާން ޑިސެމްބަރު މަހުގެ 22 އިން މިދިޔަ މަހުގެ 19 އަށް ހުޅުވައިލުމުން ރަޖިސްޓްރޭޝަނަށް ހުށަހެޅި ފަރާތްތަކަށް އެކަން މިހާރު މެސެޖްކޮށް އަންގާފައިވާ ކަމަށެވެ.
ނަމަވެސް ދަފުތަރުގައި ރަޖިސްޓްރީވި ކަން ނާންގާ ފަރާތްތަކުން އެއްވެސް ޝަކުވާއެއް ހުށަހަޅަން ބޭނުންވާ ނަމަ އެ ފުރުސަތު މި މަހުގެ 16 އާ ހަމައަށް ހުޅުވާލާފައިވާ ކަމަށް މިނިސްޓްރީން ވަނީ ބުނެފައެވެ.
މިނިސްޓްރީން ބުނީ، އެ މުއްދަތުގެ ފަހުން ހުށަހަޅާ އެއްވެސް ޝަކުވާއެއް ބަލައި ނުގަންނާނެ ކަމަށެވެ.
މެއިލް މެދުވެރިކޮށް ޝަކުވާ ހުށަހަޅާ ނަމަ ސަބްޖެކްޓްގައި ފޯމް ހުށަހެޅި މީހާގެ ނަމާއި އައިޑީ ކާޑް ނަމްބަރު އަދި ފޯނު ނަމްބަރު އެނގޭނެހެން ހުށަހަޅަން ޖެހޭނެ ކަމަށް މިނިސްޓްރީން ބުނެއެވެ.
މިދިޔަ އަހަރުގެ ފަގީރުންގެ ލިސްޓުގައި މާލެ ސަރަހައްދުން 1782 މީހުން ވަނީ ރަޖިސްޓްރީ ކޮށްފައެވެ.
