މާލެ ސަރަހައްދުން ގޯތި ދޫކުރާނެ ވަކި މީހުންތަކެއްގެ ލިސްޓެއްގެ ވާހަކަ ދައްކާ ކަމެއް އެގިވަޑައިނުގަންނަވާ ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
މިއަދު އަސްލަމް މަޖިލީހަށް ހާޒިރުކޮށްފައިވާއިރު އެހެން ވިދާޅުވެފައިވަނީ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި) މިނިސްޓަރުގެ އަރިހުން އެއްސެވުމުން ސުވާލަކަށް ޖަވާބުދެއްވަމުންނެވެ.
އިންތި ވިދާޅުވީ ރައްޔިތުންނަށް ބޯހިޔާވަހިކަން ދިނުމުގައި ގެންގުޅެނީ ވަކި ލިސްޓެއް ކަމަށް ސަރުކާރަށް ނިސްބަތްވެވަޑައިގަންނަވާ ރައްޔިތުންގެ މަޖިލީހުގެ ބައެއް މެންބަރުން ހަބަރުތައް ފަތުރުއްވާ ކަމަށެވެ. އެހެންކަމުން ބޯހިޔާވަހިކަމުގެ މަޝްރޫއު ކުރިއަށް ގެންދަނީ އެފަދައިން ތޯ އިންތި ވަނީ އައްސަވާފައެވެ.
އިންތިގެ ސުވާލަށް ޖަވާބުދެއްވަމުން އަސްލަމް ވިދާޅުވީ މާލެ ސަރަހައްދުން ގޯތި ދޫކުރާނެ މީހުންގެ ލިސްޓެއް ނޯންނާނެ ކަމަށާއި މެންބަރުން އެފަދައިން ހަބަރު ފަތުރުއްވަމުންދާކަން އެނގިފައި ނުވާ ކަމަށެވެ. އަދި އެކަހަލަ ވާހަކައެއް އަޑުއަހާފައި ނުވާ ކަމަށާއި އެފަދަ ވާހައެއް މީހަކު ދެއްކި ނަމަވެސް އެއީ ހަގީގަތެއް އޮތް ވާހަކައެއް ނޫން ކަމަށް އަސްލަމް ވިދާޅުވިއެވެ.
އަސްލަމް އިތުރަށް ވިދާޅުވީ އިންތި ނިސްބަތްކުރެއްވި މެންބަރު ނޫން އެހެން މެންބަރަކުވެސް އެވާހަކަ ދެއްކި ކަމުގައި ވިޔަސް އެއީ ހަގީގަތެއް ނޫން ކަމަށެވެ.
މާލޭގައި ބޯހިޔާވަހިކަމަށް އޮތް ދަތިތަކަށް ހައްލު ހޯދައިދިނުމަށްޓަކައި ސަރުކާރުން ހުޅުވާޅި "ގެދޮރުވެރިން"ގެ ސްކީމްގެ ދަށުން މާލެ ރައްޔިތުންނަށް މާލެ ސަރަހައްދުން 5000 ގޯތި ދޫކުރަން ސަރުކާރުން ނިންމައިފައި ވާއިރު ހުޅުމާލެ ދެވަނަ ފިޔަވަހިން 1،000 ގޯއްޗާއި ގުޅިފަޅުން 2،000 ގޯތީގެ އިތުރުން ގިރާވަރު ފަޅުން ހިއްކާ ބިމުން މަދުވެގެން 2،000 ގޯތި ދިނުމަށް ވެސް ސަރުކާރުން ވަނީ ނިންމައިފައެވެ. އަދި 4000 ފްލެޓް ވެސް މި ސްކީމްގެ ދަށުން ދިނުމަށް ވަނީ ހަމަޖެހިފައެވެ.
