މާލެއިން މީހަކު ގެއްލިގެން ހޯދުމަށްޓަކައި ފުލުހުން އާންމުންގެ އެހީއަށް އެދި ވަނަވަރު އާންމު ކޮށްފިއެވެ.
ސ. މަރަދޫ/ފޭދޫ ގަސްކަރަ، މުހައްމަދު އާސިރު އިސްމާއީލް (31އ) ހޯދަން އިއުލާން ކޮށްފައި ވަނީ، ވީނުވީއެއް ނޭނގި ގެއްލިގެން ފެބްރުވަރީ 5 ވަނަ ދުވަހު އެ އިދާރާއަށް ރިޕޯޓް ކޮށްފައިވުމާ ގުޅިގެންނެވެ.
އޭނާ މިހާރު ދިރިއުޅެނީ މާލޭގައި ކަމަށާއި އެންމެ ފަހުން ފެނިފައިވަނީ ފެބުރުވަރީ 4 ވަނަ ދުވަހުގެ 19:30 ގައި ކަމަށް ބުނެއެވެ. އޭރު އާސިރު ލައިގެން ހުރީ ނޫކުލައިގެ ޖީންސަކާއި ކަޅުކުލައިގެ ގަމީހެއް ކަމަށް އޭނާގެ އާއިލާއިން ފުލުހުންނަށް މައުލޫމާތު ދީފައިވާ ކަމަށްވެސް ބުނެއެވެ.
މުހައްމަދު އާސިރު އިސްމާއީލްގެ އެއްވެސް މައުލޫމާތެއް ލިބިފައިވާނަމަ ފުލުހުންގެ ހޮޓްލައިން 3322111 އަށް ނުވަތަ ގަލޮޅޮ ޕޮލިސް ސްޓޭޝަންގެ 9631696 އަށް ގުޅައި ހިއްސާ ކުރުމަށް ފުލުހުން އެދެއެވެ.
ރާއްޖޭގައި ފަހަކަށް އައިސް މީހުން ވީނުވީއެއް ނޭނގި ގެއްލުމުގެ މައްސަލަ ދަނީ އިތުރުވަމުންނެވެ. އެގޮތުން ފާއިތުވި ހަފްތާގައި އއ. މަތިވެރިން ވެސް ހަސަން އަލީ (ހަސަންފުޅު) ނަމަކަށް ކިޔާ މީހަކު ގެއްލިގެން ހޯދުމުގެ މަސައްކަތް ކެނޑިނޭޅި ކުރަމުން ދާއިރު މިހާތަނައް ހޯދި ހޯދުންތަކުން އޭނާގެ ހިލަމެއް އަދި ނުވެއެވެ.
އަދި އަވަށްޓެރި އިންޑިއާގެ ކޮޗިންއަށް ފާއިތުވި ހަފްތާގައި ދިވެއްސަކު ގެއްލިގެން ރިޕޯޓް ކޮށްފައި ވާއިރު އޭނާ ފެނިއްޖެ ކަމަށް އާއިލާ އިން ހާމަކުރެއެވެ.
