މާލޭގެ ރައްޔިތުންނަށް ގޯތި ދޫކުރުމަށް ހިންގާ މަޝްރޫއުގައު ގޯތި ދޭން ނިންމާފައިވާ އަދަދު އިތުރުކުރަން ނިންމާފައިވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެއެވެ.
މިދިޔަ އަހަރުގެ ޖުލައި މަހުގެ 26 ވަނަ ދުވަހުން ފެށިގެން މާލެ ސަރަހައްދުން ބިމަށާއި ފްލެޓަށް ކުރިމަތިލުމަށް ފުރުސަތު ހުޅުވާލާފައިވާ އިރު، ފޯމު ހުށަހެޅުމަށް ހަމަޖެހިފައިވާ ސުން ގަޑި ހަމަވި އިރު، ފްލެޓަށް އެދި ޖުމްލަ 20،697 އެޕްލިކޭޝަން ހުށަހަޅާފައިވާ އިރު، ގޯތި ހޯދުމަށް 15،164 އެޕްލިކޭޝަން ވަނީ ހުށަހަޅާފައެވެ.
މިހާރު ކުރިއަށްދާ ރައްޔިތުންގެ މަޖިލީހުގެ މި އަހަރުގެ ފުރަތަމަ ޖަލްސާގައި ރިޔާސީ ބަޔާން އިއްވަވަމުން ރައީސް ވިދާޅުވީ، މާލޭގެ ބޯހިޔާވަހިކަމަށް ހުޅުވާލުމުން ފްލެޓާއި ގޯތި ހޯދުމަށް ހުށަހެޅި އެޕްލިކޭޝަންތައް މިހާރު ޕްރޮސެސް ކުރަމުން ދާ ކަމަށާއި މި އަހަރުގެ ޖޫން މަސް ނިމުމުގެ ކުރިން ބޯހިޔާވަހިކަން ލިބޭ ފަރާތްތަކަށް އެކަމުގެ ލިޔުން ހަވާލު ކުރާނެ ކަމަށެވެ. ހަމައެއާއެކު ކުރިން މާލެއިން ގޯތި ދޫކުރަން ނިންމި އަދަދަށް ވުރެ އިތުރަށް ނިންމާފައިވާ ކަމަށް ވެސް ރައީސް ވިދާޅުވިއވެެ. ނަމަވެސް އިތުރު ކުރަން ނިންމި އަދަދު އެމަނިކުފާނުގެ ރިޔާސީ ބަޔާނުގައި ހާމައެއް ނުކުރައްވައެވެ.
ފްލެޓާއި ގޯތި ދޭނެ ކަމަށް މިދިޔަ އަހަރުގެ ރިޔާސީ ބަޔާން އިއްވަވަމުން ރައީސް ދެއްކެވި ވާހަކަފުޅަށް އަލިއަޅުއްވާލައްވަމުން ވިދާޅުވީ، އެ މަސައްކަތް ނިންމަން ސަރުކާރުން ހިފި އަމާޒުގާ އެއްވެސް ކަސިޔާރު ކަމެއް ނެތް ކަމަށެވެ. ދައުރެއްގެ ތެރޭގައި ބިންގަލުން ފެށި ފްލެޓް އިމާރާތެއް ނިންމާ، ރައްޔިތުން ބޯހިޔާވަހި ކުރާ ފުރަތަމަ އަހަރަށް މި އަހަރު ވެގެން ދާނެ ކަމަށް ރައީސް ވިދާޅުވިއެވެ. އެ ފްލެޓް ތަކަކީ ޖާގައިގެ ގޮތުން ތަނަވަސް، ތަފާތު ފްލެޓްތަކަކަށް ވެގެން ދާނެ ކަމަށް ވެސް ރައީސް ވިދާޅުވިއެވެ.
ހައުސިން ލޯނާ ގުލޭ ގޮތުން ވާހަކަ ދައްކަވަމުން ރައީސް ވިދާޅުވީ، ހުސްވި ޖެނުއަރީގެ ނިޔަލަށް ގެދޮރުވެރިޔާ ލޯނުގެ 579 އެޕްލިކޭޝަން ސަރުކާރަށް ލިބުނު އިރު، އޭގެ 55 އިންސައްތަ ލޯނު މިހާރު ވަނީ އެޕްރޫވް ކޮށްފައި ކަމަށެވެ. އަދި 249 ފަރާތަކާ އެކު ލޯނު އެއްބަސްވުމުގައި ސޮއި ކުރެވިއްޖެ ކަމަށެވެ.
މީގެ އިތުރުން އަތޮޅު ތެރޭގައި އިމާރާތް ކުރާ ހައުސިން ޔުނިޓްތަކުން 556 ހައުސިން ޔުނިޓް އަންނަ މެއި މަހުގެ ނިޔަލަށް އެއްކޮށް ނިންމާނެ ކަަމަށާއި އިތުރު 2200 ހައުސިން ޔުނިޓްގެ މަސައްކަތް އަތޮޅުތެރޭގައި ކުރިއަށް ދާ ކަމަށް އެމްނިކުފާނު ވިދާޅުވިއެވެ.
މާލޭގައި ބޯހިޔާވަހި ކަމަށް އޮތް ދަތިތަކަށް ހައްލު ހޯދަ އިދިނުމަށްޓަކައި ސަރުކާރުން ހުޅުވާޅި "ގެދޮރުވެރިން"ގެ ސްކީމްގެ ދަށުން މާލެ ރައްޔިތުންނަށް މާލެ ސަރަހައްދުން 5000 ގޯތި ދޫކުރަން ކުރިން ސަރުކާރުން ވަނީ ނިންމާފައެވެ. އެއީ ހުޅުމާލެ ދެވަނަ ފިޔަވަހިން 1،000 ގޯއްޗާއި، ގުޅިފަޅުން 2،000 ގޯތީގެ އިތުރުން ގިރާވަރު ފަޅުން ހިއްކާ ބިމުން 2،000 ގޯއްޗެވެ. އަދި 4000 ފްލެޓް ވެސް މި ސްކީމްގެ ދަށުން ދިނުމަށް ވަނީ ހަމަޖެހިފައެވެ.
