އައްޑޫ ސިޓީ ކައުންސިލްގެ ޕީޕީއެމްގެ މެންބަރަކު އެމްޑީޕީ އަށް ސޮއިކުރުމާއެކު އައްޑޫ ސިޓީ ކައުންސިލްގެ މެޖޯރިޓީ އަލުން އެމްޑީޕީއަށް ލިބިއްޖެއެވެ.
އައްޑޫ ސިޓީ ކައުންސިލްގައި ޖުމްލަ 13 މެންބަރުން ތިއްބަވާއިރު އޭގެ ތެރެއިން 3 މެންބަރުންނަކީ ޕީޕީއެމް މެމްބަރުންނެވެ. 6 އެމްޑީޕީ މެންބަރުން ތިއްބަވާއިރު މިނިވަން ތިން މެންބަރުން ތިއްބަވައެވެ.
ޕީޕީއެމް މެންބަރެއްގެ ގޮތުގައި މިހާތަނަށް ހުރި އައްޑޫ ފޭދޫ ކައުންސިލަރު މުހައްމަދު ފައިސަލް އެމްޑީޕީއަށް މިއަދު ސޮއިކޮށްފައިވާއިރު އޭނަ އެ ޕާޓީ އަށް ސޮއިކުރައްވާ ޗެއާޕާސަން ފައްޔާޒް އިސްމާއީލާ ފޯމު ހަވާލުކުރެއްވި ބައްދަވުމުގައި ރައީސް އިބްރާހީމް މުހައްމަދު ސޯލިހާއި އެމްޑީޕީގެ ޕާލިމަންޓަރީ ގްރޫޕްގެ ލީޑަރު މުހައްމަދު އަސްލަމް ވެސް ބައިވެރިވެވަޑައިގެންނެވިއެވެ.
ފައިސަލް އެމްޑީޕީ އަށް މިއަދު ސޮއި ކުރެއްވުމާ އެކު، އެމްޑީޕީގެ މެންބަރުންގެ އަދަދު އިތުރުވެ، އެ ކައުންސިލްގެ ސާފު އަގުލަބިއްޔަތު އެމްޑީޕީ އަށް މި ވަނީ ލިބިފައެވެ.
އައްޑޫ ސިޓީއަކީ ޒަމާނުއްސުރެ އެމްޑީޕީއަށް ތާއީދު ބޮޑު ސިޓީއެކެވެ. ނަމަވެސް ކައުންސިލް އިންތިހާބުގައި އައްޑޫ ސިޓީގެ އިތުރުން މާލެ ސިޓީގެ އަގުލަބިއްޔަތު އެމްޑީޕީ އަށް އެއްކޮށް ގެއްލުނެވެ.
