އާންމުންގެ މެދުގައި ނަފްރަތު އުފެދޭ ގޮތަށް ސޯޝަލް މީޑިއާގައި ވާހަކަ ދައްކާފައިވާ މައްސަލަ އާ ގުޅިގެން ހައްޔަރުކުރި އައްބާސް އާދިލް ރިޒާ މިއަދު ދޫކޮށްލައިފިއެވެ.
އައްބާސްގެ ބަންދުގެ މުއްދަތުގެ މިއަދު ހަމަވެފައިވާއިރު ކްރިމިނަލް ކޯޓުން އޭނާ ދޫކޮށްލާފައި ވަނީ ޝަރުތަކަކާ އެކުއެވެ. ނަމަވެސް އެ ޝަތުރުތަކުގެ ތަފްސީލެއް ނުލިބެއެވެ.
އައްބާސް އާދިލް ރިޒާގެ ނަމުގައި ހިންގާ ޓުވިޓާ އެކައުންޓަކުން އިންޑިއާގެ އެމްބަސީ ރޯކޮށްލަން ހިއްވަރު ދިން މައްސަލަ އާ ގުޅިގެން ފުލުހުން އޭނާ ހައްޔަރުކޮށްފައި ވަނީ 2022 ވަނަ އަހަރުގެ ޑިސެމްބަރު 25 ވަނަ ދުވަހުއެވެ.
މީގެ 19 ދުވަސް ކުރިން ފުލުހުން އައްބާސް ހައްޔަރު ކުރީ ފުލުހުން ތަހުގީގު ކުރާ މައްސަލައަކާ ގުޅިގެން ކޯޓު އަމުރެއްގެ ދަށުންނެވެ. އަދި އޭނާގެ ބަންދުގެ މުއްދަތު ވަނީ 3 ފަހަރު މަތިން އިތުރުކޮށްފައެވެ.
އައްބާސް ހައްޔަރު ކުރީ ޓުވިޓާގައި އައްބާސް ގެ ނަމުގައި ހިންގާ ޓުވިޓާ އެކައުންޓުން ކުރި ޓުވިޓެއްގައި 2012 ވަނަ އަހަރު ފެބްރުއަރީ މަހު އައްޑޫގައި ހުޅުޖެހީ އިންޑިއާގެ އޯޑަރަށް ކަމަށާއި އެކަމުގެ ބަދަލު ނުހިފި އޮތުމުން އެމްބަސީން ބަދަލު ހިފަން ފެންނަ ކަމަށް ބުނެފައި ވަނިކޮށެވެ.
އިންޑިއާ އައުޓް ހޭޝްޓެގާ އެކު ކޮށްފައިވާ އެ ޓުވިޓާ ގުޅިގެން އައްބާސް އާ މެދު ފިޔަވަޅު އެޅުމަށް ގިނަ ބަޔަކު ވަނީ ގޮވާލާފައެވެ. އެހެންނަމަވެސް އައްބާސް ވަނީ އެއީ އޭނާ ބޭނުންކުރާ ޓުވިޓާ އެކައުންޓެއް ނޫންކަމަށް ބުނެފައެވެ.
